GIBUNTOG sa Garden Village ang Warehouse, 84-74, sa ilang knockout semifinal match niadtong Miyerkules sa gabii sa naghinapos nga 1st Tubu Master Construction and Services basketball tournament nga gipahigayon sa barangay Basdiot sports complex, lungsod sa Moalboal.
Sa kadaugan, ang Garden Village maoy nakakuha sa katungod nga makigsangka sa Admin sa championship match nga gikatakda ugmang adlawa.
Si Jomfey Borja mitali og 24 puntos aron pangulohan ang Garden Village ug sa samang higayon maoy napiling best player of the game.
Hinuon, isip walay pildi sa elimination ug sa semifinals round, ang Admin maoy nakaangkon sa twice-to-beat advantage sa finals.
Sa dili pa ang championship match nga sugdan sa alas 7:30 sa gabii, usa ka exhibition game maoy molamas sa kagabhion.
Ang Red team makigsangka sa Black squad sa Tubu Master 40 and above ballclub special match.
Ipahigayon ang awarding ceremony human gilayon sa championship match. (JBM)