MGA duwa karon:
4:30 pm. - Meralco vs. Blackwater
7:00 pm. - TNT KaTropa vs. Alaska
Panag-abot sa ulo ug ikog maoy senaryo nga masaksihan karong gabii sa dihang magsangka ang league-leading TNT KaTropa ug ang usa sa nangiwit sa standing, ang Alaska Aces, sa main game sa PBA Governor’s Cup nga ipahigayon sa Ynares Center-Antipolo.
Ang KaTropa, ang bugtong team nga wa pa makatilaw og kapildihan sulod sa unom ka mga duwa, mosulod sa korte nga inilog batok sa nangiwit nga Aces, kansang unang kadaugan narehistro niadto lang Dominggo pinaagi sa pagbuntog sa laing nangiwit nga Rain or Shine, 78-71.
Sa maong kadaugan ang import sa Alaska nga si Franko House mipuga og 22 puntos ug 23 ka rebounds, apan ang presensiya ni Jeron Teng maoy nagwanang sa makutas nga kadaugan nga ila lang naaninaw sa krusyal nga mga nahabiling segundos.
Si Teng, kinsa mao pay pagduwa og balik human sa hataas nga pagpahuway tungod sa injury niini sa tuo nga bagtak, mitali og 18 puntos, siyam niini sa ikaupat nga kwarter ug ang iyang assist ngadto ni Jayvee Casio sa katapusang 17.7 segundos maoy nagselyo sa kadaugan.
Hinuon batok sa KaTropa, ang Alaska ni coach Jeff Cariaso, mag-atubang og malisod nga tahas.
Dala ang 6-0 nga baraha, katapusang gibiktima sa TNT mao ang sister team nga Meralco Bolts sa dihang ang import nga si KJ McDaniels mipabuto og 51 puntos sa ilang 116-113 nga kadaugan niadtong Oktubre 12.
Ang match-up tali ni McDaniels ug ni House kinsa pulos mga kanhi NBA players, maoy mahimong sentro sa atraksiyon sa panag-engkuwentro.
Sa preliminary action, back-to-back win maoy tuyo sa Blackwater Elite batok sa Meralco Bolts sa panag-engkuwentro nga sugdan sa alas 4:30 sa hapon.
Ang Elite (2-3) nagselebrar sa ilang ikaduhang daog niadtong Miyerkules sa pagbalik sa ilang import nga si Marqus Blakely pinaagi sa pagpakaging sa inilog nga Magnolia Hotshots.
Hinuon wa moduwa ang reinforcement sa Hotshots nga si Romeo Travis niadtong tungora tungod sa injury. Si Blakely miani og 21 puntos ug 13 ka rebounds ug nakadawat usab og igong suporta gikan sa mga locals nga sila si Mark Belo, Mike Digregorio ug Rabeh Al-Hussaini.
Ang Bolts (3-2) gipaabot nga mosandig sa kalantip sa ilang beteranong import nga si Allen Durham kinsa nakakolekta og 43 puntos ug 10 ka rebounds sa ilang kapildihan sa KaTropa. (JBM)