SAYO sa buntag. Nagubot ang barangay Buagsong kay may tawong patay nga wa nay ulo ang nahipalgan sa baybayon.
“Kinsa ning tawhana?” maoy unang nalitok ni Inspektor Mario Damador, ang hepe sa kapulisan sa lungsod. Iyahayg pangambot ang mga tawo nga nahadugok. Lisod ilhon ang tawo nga mahamulag ang ulo sa iyang lawas. Unya may tigulang babaye nga maghangos nga miabot.
Human mosuling sa patayng lawas nga nagbuy-od kalit kining misinggit, “Si Yunie kini! Si Yunie kiniii!” Ug nagminatay paghilak ang tigulang babaye.
“Ig-unsa nimo siya, Iya?” sukot sa hepe.
“Akoa siyang anak, Sir!”
Didto na sa buhatan sa kapulisan gipadayon ni Insp. Damador ang pagsukot-sukot kang Iya Marta.
“Wala bay gikaaway kini si Yunie kagabii, Iya?” matod sa hepe. “Wala, Sir. Didto kanang akong anak sa ilang Mayule kagabii.”
“Kinsa kana si Mayule?” sa hepe.
“Hinigugma ni Yunie,” ni Iya Marta.
Gipatawag sa hepe si Mayule. Lakip na ang usa ka Jongjong nga giingong labing suod nga higala sa anak ni Iya Marta. Apan ang mga kasayuran gikan kanila nakapasamot sa kalibog sa mga suluguon sa balaod.
NANGLABAY ang katuigan. Mitaliwan na sa laing kalibutan si Iya Marta. Wa mahatagig hustisya ang kamatayon sa anak niyang si Yunie. Ug sugo sa ilang kapalaran sila si Mayule ug Jongjong ang nagkadayon sa salag sa kaminyuon.
Usa ka hapon masaya ang magtiayon nga nanuroy daplin sa baybayon. Samtang si Mayule nalingaw nga naglantaw sa halapad nga kalawran, si Jongjong naglakaw-lakaw sa puting bas ug mihanggap sa lab-as nga hangin gikan sa dagat. Unya nakakita siyag alimango nga nagkamang sa hunasan. Kahikurat sagol kahinagop ang gibati ni Jongjong. Iyang giduol ang alimango aron sikupon. Apan dali kining misulod sa usa ka lungag. Maampingon kining gikuot ni Jongjong, apan kalit siyang nahatig-ik. Gipaak sa alimango ang iyang kamot sud sa lungag. Dali kini niyang gibunlot. Apan nakasinggit siya sa tumang kalisang. Kay inay alimango, kalabera sa tawo ang miukob halos katunga sa iyang palad.
“Tabang! Tabaaaaang!” Misulbong sa kahanginan ang nagkapaas nga tingog ni Jongjong. Daw buang kini nga nahadagan-dagan sa kalisang sa baybayon sa barangay Buagsong, ang dapit diin nahipalgang patay si Yunie, may tulo na ka tuig ang nakalabay.
Didto sa buhatan sa kapulisan, gitutokan ni Insp. Mario Damador si Jongjong. Nagping-it kini sa kasakit ug miluspad ang nawong tungod sa daghang dugo nga nausik. Padayon kining nagtabisay sa iyang kamot nga giukoban sa kalabera.
“Kalabera...!” matod sa hepe nga nakapayanghag sa tanan. Sa kalabera siya nakigsulti. “Kon si kinsa ka man, pakit-a kog timailhan kon mahinganlan ko ang imong ngalan. Ikaw ba si Pablo Bangas?” Kahilom. “Ikaw ba si Romeo Agbo? Si Alex Amores?” Kahilom gihapon. Ug dinha pa kadtoy gipanghinganlan sa hepe, lakip na kadtong nangalumos sa dagat nga wala hipalgi ang patay nilang mga lawas. Apan way timailhan. Mipadayon pagpangutana ang hepe.
“Kalabera, ikaw ba si Yunie Banay-banay nga anak ni Iya Marta?”
Kalit nataktak ang upat ka ngipon sa kalabera. Nahasiga ang mga mata sa hepe. Nahingangha ang tanan nga nakasaksi.
“Kinsay nagpatay nimo? Kini ba si Jongjong Boten?” sukot sa hepe.
Diha-diha natangtang ang kalabera nga miukob sa kamot ni Jongjong. Nahurot katangso ang nahabilin pang mga ngipon nga nagkadugo. Unya nagkayagaw ang tanan sud sa buhatan sa kapulisan samtang mikisi-kisi si Jongjong nga gisignit ni PO2 Joel Atillo dihang gimando ni Insp. Mario Damador nga ibalhog siya sa bilanggutan. (KATAPUSAN)