Mga koleksyon sa BenCab Museum

OIL PAINTINGS: Pipila lang kini sa mga painting ni BenCab nga nagpakita sa nagkalain-laing dagway sa kultura ug tradisyon sa Pilipinas. (Hulagway kuha ni Herty B. Lopez)
OIL PAINTINGS: Pipila lang kini sa mga painting ni BenCab nga nagpakita sa nagkalain-laing dagway sa kultura ug tradisyon sa Pilipinas. (Hulagway kuha ni Herty B. Lopez)

KON makahigayon ka og suroy ngadto sa Summer Capital of the Philippines – Baguio City ayaw palabya ang higayon ug i-apil sa inyong itinerary ang pagbisita sa BenCab Museum, ilabi na niadtong mahiligon sa arts.

Ang National Artist nga si Benedicto Reyes Cabrera o mas naila nga si BenCab nagtukod og iyang kaugalingong museum diin gi-display ang iyang paintings, drawings, prints ug sculptures.

Kinsa si Bencab?

Si Benedicto Cabrera giila nga master of contemporary Philippine art. Gani naabot na sa nagkadaiyang dapit sa Asya, Uropa ug America alang sa iyang exhibit.

Gipasidunggan si Cabrera atol sa pamunoan ni kanhi Presidente Gloria Macapagal-Arroyo nga National Artist sa natad sa Visual Arts niadtong 2006.

Asa dapit ang museum?

Ang BenCab Museum nahimutang sa Km. 6 Asin Road, 15-minutos kini gikan sa sentro sa Baguio City.

Dili lang kini edipisyo sama sa naandang museum nga inyong nasuroyan kay aduna kiniy ‘breathtaking view sa tupad niini nga garden, farm, bungtod, mini forest, plus makita sab ang sapa ug waterfalls.

Kon mobisita ka sa maong dapit, bisan paman og dili ka fan og arts o paintings apan tungod sa mga maanindot nga artworks nga naka-display sa museum, siguradong madani ka og pahulagway tungod kay instagrammable usab ang lugar.

Gikan sa granary gods, lime containers, native implements, ngadto sa mga karaang hinagiban sa taga-Cordillera, ang imong makita sud sa maong museum.

Apan adunay pakapin, naa usa ka bahin sa museum nga gitagana nga rated PG, dili na nako isaysay kamo nay diskubre kon unsay mga art piece sa maong lawak.

Gitinguha sa BenCab Museum nga mapalambo ug ma-promote ang natad sa arts, lakip na ang pagpanalipod sa kinaiyahan, kultura ug tradisyon sa Cordillera.

Gawas sa museum, adunay eco-trail tour nga mamahimong masuwayan sa dapit, susama ra ang bayad apan adunay laing bayad nga P100 alang sa guide.

Pahinumdum

Dili pwede mag-video sa sulod sa museum, mamahimo nga makahulagway apan dili pwede ang adunay flash.

Gidili usab ang paghikap sa mga artworks ingon man dili pwede pagdala og pagkaon sa sulod ug mga hayop.

Atol sa akong pagduaw sa maong lugar gi-feature ang artworks ni Jason Montinola nga “Through the Depths of Space.”

Souvenir shop

Sa kadtong nagkolekta og art materials o mopalit og pasalabong adunay baligya ang museum nga art books, paper products sama sa postcards, notepad, highland art & crafts sama sa wood carvings ug tela. Sa kadtong mohatag og pasalubong adunay souvenir shirts and caps nga mapalit sab.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph