SUPERBALITA CEBU

Nalzaro: Pangilkil sa Citom og traffic police

Saksi

POSIBLING adunay lahugay o revamp ang mahitabo sa Cebu City Transportation Office (CCTO) gumikan sa reklamo sa mga sakop sa Cebu Trucking Services Association kabahin sa pangilkil nga gihimo sa pipila ka traffic enforcers uban sa mga traffic policemen sa Cebu City Police Office (CCPO). Mismo si Mayor Edgardo Labella nakadawat sa mga reklamo batok sa salawayong binuhatan sa mga sakop sa Citom ug mga traffic policemen. Nakadawat usab ako sa samang reklamo gikan sa mga trucker apan wala lang sila magpa-ila.

Ang modus ning mga Citom personnel ug traffic policemen mao nga anha sila mopahimutang ug mag-atang sa exit gates sa pantalan. Ilang harangon o parahon ang cargo trucks nga magdala og kargamento. Unya ila kining pangitaan og violations sama sa mga depekto sa trak. Ug ila dayon hulgaon ang driver ug pahinante nga i-impound ang trak apil ang kargamento.

Apan kon ilang ma-negotiate ang tag-iya sa kargamento, ilang i-release ang cargo truck ug kargamento. Mo-demanda ang grupo og P5,000 ngadto sa P8,000 matag kargamento. Mapugos og hatag sa ilang demanda ang tag-iya labi pa kon mapan-os ang ilang kargamento kay matanggong sa dugay nga panahon.

Ambot kon aduna bay kalibutan ang Citom chief nga si Ricardo Barandog niining binuhatan sa iyang mga tawo? Kon wala siyay kalibutan gikinahanglan nga iyang imbestigahan kay makadaot kini sa administrasyon ni Mayor Edgardo Labella. Gawas pa, dili gusto si Labella ning maong binoang. Si CCPO Director Col. Gemma Vinluan misaad nga iya ipa-imbestigar kining maong binoang sa iyang mga tawo sa traffic division.

Kining depekto sa mga cargo truck mabasol pod nato niini ang Land Transportation Office (LTO) kinsa maoy in-charge sa registration. Nganong nagdagan man gihapon kining mga sakyanan sa kadalanan nga adunay depekto? Ang ubang mga trailer walay plate number ug walay rehistro. Gumikan gihapon kini sa korapsiyon sa maong ahensiya. Ang vehicle inspectors mo-approved lang sa registration sa mga sakyanan bisan wa nila personal nga ma-inspeksyon. Ngano man? Puwede man silang mabayran bisan non-apperance sa mga sakyanan. Daghan pa gyud ang corrupt.(bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph