SUPERBALITA CEBU

Editoryal: Sigeng lalis

Editorial Cartoon by John Gilbert Manantan

KANIADTO pa gilalisan kon unsa nga paagi ug matang sa transportayon ang angay ug haom nga gamiton dinhi sa Sugbo aron pagsulbad sa suliran sa trapiko. Gani, 2018 unta ang target mahuman ang Bus Rapid Transit system nga sugdan sa 2016.

Hangtod karon, 2019 na lang, bisan usa lang ka bus way makitang nagdagan sa rota nga gitagana alang niini. Dunay saad nga sugdan kini sa di pa matapos ang 2019. Mahinayon gyud kaha taliwa sa mga hungihong nga duna pa may daghang buhatunon aron kini masugdan?

Bitaw, husto kaayo si Gobernador Gwendolyn Garcia nga di maayo nga magsige na lang og lalis kon unsa ang solusyon sa trapiko unya way nahitabo, way gipadulngan.

Tan-awa ang kahimtang sa trapiko karon sa Metro Cebu, nahimo nang normal nga kinabuhi sa mga Sugboanon. Ingon sa gidawat na lang sa kinabag-an nga mao na ni ang naandan nga kinabuhi bisan tuod kon duna pay dakong mabuhat ang kagamhanan. Apan tungod lagi sa pulitika ug lantugi, way kalamboan.

Sama ra ni sa usa ka sakayan sa dagat nga nahunong taliwala sa lawod kay naglalis ang mga mamugsay kon asa ang ilang direksyon. Nahunong sila taliwala sa dagat hangtod nga naabtan og unos ug nalunod. Sa mga pagtuon, binilyon ang perdisyon sa patigayon ug uban pa sa suliran sa trapiko.

Hinaut pa nga undangon na ang lalis kay nagkadaku ang suliran. Kon unsa ang mas dali nga solusyon sa problema, angay na kining ipatuman. Undangon na ang pagsige og lalis tungod kay di makairog ang nasod kon kanunay na lang nga ingon niani ang atoang kadagkuan.

Wa na gani kinahanglana pa unta ang pagdeklarar og krisis sa transportasyon kay klaro na man nga mao ni ang suliran. Pinaspasay sa pagpatuman sa mga solusyon sa problema sa trapiko ang gikinahanglan karon, di na angay pang huwaton ang pipila ka mga tuig kay hagbay rang natuok ang mga Sugboanon diha sa mga karsada.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph