GAWASNON na ang drayber sa awto nga niambak sa center island sa Cebu South Coastal Road sa Dakbayan sa Talisay nga nakapatay sa nagmaneho og motorsiklo niadtong Lunes sa buntag, Oktubre 14.
Kini human nga nakig-settle ang pamilya sa biktima nga si Marjun Paragoso ngadto sa suspek nga si Kurt Joseph Año.
Matod ni Patrolman Kim John Amolo, imbestigador sa Lawaan 1 Police Precinct nga Miyerkules, Oktubre 16, nipatim-aw ang pamilya ni Paragoso sa ilang buhatan.
Sila niduso og affidavit of desistance ug nga dawaton nalang nila ang pinansyal nga hinabang alang sa nabiling pamilya ni Paragoso.
Abagahon usab ni Año ang pagpalubong sa biktima.
Kini tungod usab kay nituo ang pamilya ni Paragoso nga wa gituyo ni Año ang nahitabo ug disgrasya lang.
Si Año nagmaneho sa iyang puti nga awto paingon mopauli sa Talisay, gikan sa Cebu City pasado alas 6 sa buntag niadtong Lunes. Gituohan nga nakatulog si Año samtang nagmaneho hinungdan nga niambak sa center island ang sakyanan nga nakaigo pa ni Paragoso.
Si Paragoso nagmaneho sa iyang motorsiklo. Patay diha-diha si Paragoso human sa grabe nga impact nga nahiaguman. (FMD)