PATAY ang usa ka 31 anyos nga babaye human pusila sa nag-inusarang gunman sa sudlonon nga bahin sa Sitio Ponce-2, Barangay Carreta, Siyudad sa Sugbo.
Ang kapulisan duna nay person of interest sa pagpatay kang Jackylyn Palomas, 31, human kini gitumbok sa usa ka saksi, matod ni P/Maj. Joemar Pomarejos, hepe sa Waterfront Police.
Alas 4 Huwebes sa kaadlawon, Oktubre 17, gisundan si Palomas sa gunman samtang pasulod sa eskinita dayon gipusil.
Naigo sa tangkugo si Palomas nga miresulta sa hinanaling kamatayon.
Tulo ka mga kabhang sa bala sa kalibre .45 nga pistola narekober sa crime scene kon diin nahagba si Palomas.
Matod ni Pomarejos nga base sa ilang imbestigasyon, ang suspek igsuon ra sa kapuyo ni Palomas nga residente ra sa barangay.
“Makonsidera namo nga siya ang person of interest sa pagpusil sa biktima labi na nga dunay nakakita sa maong insidente,”matod ni Pomarejos.
Wa una nganli ni Pomarejos kon kinsa kini.
Nahibaw-an sa kapulisan nga sila si Palomas ug suspek dunay bikil ug nagkaatubangay na sa barangay sa Carreta apan, wala mahusay.
“Nahibaloan namo nga gawas sa nag away-away ning duha, nagkalalis usab sila sa ilang mga suki sa drugas,”dugang pa ni Pomarejos.
Si Palomas kapuyo sa usa ka Rudy Sanchez nga nadakpan nila niadtong Enero ning tuiga sa pagpamaligyag illegal drugs.
Samtang ang suspek mao unta ang ilang target sa buy-bust sa milabay nga semana apan nakabantay sa iyang mga sakop hinungdan nga nakasibat.
Panagsungi ug illegal drugs ang gitan-aw nila ni Pomarejos nga motibo sa pagpatay.