TUNGOD sa paghigpit sa karneng baboy gikan sa Luzon, dunay nisuway sa pagpalusot niini pinaagi sa pagbaligya sa online.
Lakip na sa monitoron sa African Swine Fever Task force sa probinsya sa Sugbo karon ang mga Sugbuanong online sellers sa mga pork ug meat products nga gikan sa Luzon.
Kini human nagpositibo sa pagpamaligya og mga produktong baboy ang usa ka online seller nga lumolopyo sa dakbayan sa Talisay.
Sa gihimong test buy operation sa ASF Task Force, matod ni Provincial Veterinarian Dr. Mary Rose Vincoy nga nakita nila kini sa social media site nga Facebook.
Gi-confiscate sa task force ang gipaninda nga meat proucts sa nahisgutang online seller.
May free delivery pa kini alang sa mga buot mopalit sa mga produkto nga gikan sa Pampanga nga mga tocino, longganisa, chicken longganisa, hotdogs ug uban pa.
Wa hinuon dakpa o gipamulta ang selller apan giisyuhan na hinuon sa task force og cease and desist order si Rivera aron dili na makapamaligya.
Gipugngan ang ngan niini kay way kihang gipasaka.
Matod ni Vincoy nga wala pa hinuon sila’y penalty nga ipahamtang sa online sellers apan siguro siya nga monitoron nila kini sanglit posible kining taguanan sa mga produkto nga apektado sa ASF.
Nipasalig ang National Meat Inspection Services (NMIS) nga ang mga karneng baboy nga gipangbaligya sa merkado luwas nga kaunon sa tawo.
Mipasiugda ang Acting Director sa NMIS 7, Dr. Eduardo Oblena, sa ilang kampanya nga “Pinoy pork is safe to eat” aron maghatag og kasayuran sa katawhan nga ang mga local nga karneng baboy nga gibaligya sa merkado diri sa Central Visayas niagi pa og daghang inspection aron masuta nga luwas kini kan-on.
“We would like to emphasize that Pinoy pork is safe to eat as long as our animal partner slaughter house have undergone ante mortem inspection and post-mortem inspection,” sigon ni Oblena.
Kining duha ka inspeksyon, nagsiguro nga ang mga mananap nga giihaw luwas ra nga sa pgakonsumo sa mga tawo ug ang mga karne niini adunay tatak gikan nga giaprobahan sa mga inspector sa NMIS ug adunay kompleto nga dokumento.
Kasamtangan, mipaambit ang Presidente sa Virgina Fams Inc. nga si Rolando Tambago nga ang salig sa mga kunsomidor sa karneng baboy nibalik pinaagi sa gidaghanon sa mga baboy nga giihaw sa ilang slaughter house.
“The consumer confidence is nabalik naman so we can see it sa mga baboy nga giihaw sa slaughter house, vibrant na ang mga consumption,” sigon ni Tambago.
Mipasalig siya nga walay angay nga ikabalaka sa supply sa mga karneng baboy karong umaabot nga pasko sanglit, adunay igong supply ang mga supplier sa Cebu ug Visayas nga motapak sa posibleng pagkuwang na sa ham.
Kining maong kampanya gidungansa pagsaulog sa 26th Meat Safety Consciousness Week ug 47th Anniversary sa NMIS nga gipahigayon gahapon adlawng Huwebes, Oct. 17, 2019. (KFD & ANV)