5 ka BOD sa MCWD di mokanaug

WAY planong mokanaog sa pwesto ang lima ka miyembro sa Metropolitan Cebu Water District (MCWD) Board of Directors bisan og giisyuhan na sila og notice of termination ni Cebu City Mayor Edgardo Labella.

Si MCWD Board chairman Joel Mari Yu nagkanayon nga mando ni Labella matawag nga "ilegal ug inbalido."

Sa suwat-tubag ni Labella nga penitsahan og Oktbre 17, 2019, Huwebes, si Yu niingon nga nagdumili siya sa pagtuman sa mando sa mayor sa pagtaktak kaniya ug laing upat ka mga kauban tungod sa naasoy nga rason.

"It is in direct contravention of no less than the Philippine Constitution, Presidential Decree No. 198, existing relevant circulars and issuances, including jurisprudential guidelines," matod ni Yu sa ilang suwat.

Gawas ni Yu, ang board members Augustus "Jun" Pe Jr, Procopio "Coping" Fernandez, Atty. Ralph Sevilla ug board secretary Cecilia Jugao-Adlawan di usab motuman sa notices of termination gikan ni Labella.

Matod ni Yu, bisan sa mando ni Labella nga ang MCWD modayon sa pagpatuman sa mandato bisan dunay daghang babag.

Reklamo ni Samsam

“Ako lang sila giingnan nga nalipay ko nga nibisita sila nako to coordinate, I was very frank also that they were a little late in coordinating, na-open lang ang ilang eyes when I said sa MCDCB (Metro Cebu Development and Coordinating Board) nga supplier mi og tubig, but ang inyong supplier wala gani ninyo bisitaa.”

Kini ang pamahayag ni Talisay City Mayor Gerald Anthony Gullas Jr. ngadto sa kadagkuan sa Metro Cebu Water District nga nituyo sa iyang buhatan, Huwebes sa buntag, Oktubre 17.

Gihulagway sa mayor, nga sa iyang nahibaw-an gikan sa niagi pa nga administrasyon, sa iyang apohan, karon Kongresista Eduardo Gullas, karon ra nakig-alayon kanila ang MCWD, ilabi na kalabot sa water crisis.

Kahinumduman nga ang konseho sa dakbayan sa Talisay nipatawag na sa MCWD kay buot nila magpasabot sa sitwasyon sa tubig.

Ilabi na sa mga reklamo sa Talisaynon sa kanunay nga walay agas sa tubig nga gikan sa MCWD, bisan sila ang usa sa mga tinubdan.

Matod sa mayor nga karon lang nila nasuta nga magkuhaan og 50,000 cubic meters kada adlaw, ang MCWD sa syudad sa Talisay nga maoy iapud-apud sa ilang konsumidor.

Apan 15,000 cubic meters lang ang mahatag sa mga konsumidor sa Talisay, kada adlaw. Ang demand sa Talisaynon anaa sa 38,000 cubic meters, matag adlaw.

Hinungdan giawhag niya ang taga MCWD nga makig-alayon na dayon sa konseho ug kabarangayan pagsuta kon asa kining mga lugar nga nagkinahanglan og dinalian nga aksyon.

Dugang sa mayor nga tinguha lang gyud niya nga mapangitaan og short term ug long term nga solusyon sa problema sa suplay sa tubig sa ilang dakbayan.

“We don’t even know the counter measures sa ilang gi-extract nga water from the City, and how much you are giving back. So, nalipay na mi nga nakig-coordinate na sila. (Ila gipasabot) nga supply is much much lower than the demand. Naa sila mga plano, hopefully if they can meet each and every barangay captain, they can figure out the situation, I think that would be a good step, though late, but a good step,” pasabot ni Gullas.

Malaumon Ahong

Samtang malaumon si Lapu-Lapu City Mayor Junard “Ahong” Chan nga hingpit nang masolusyonan sa bag-o unyang matudlong BOD sa MCWD ang suliran sa supply sa tubig sa dakbayan nga hagbay ra usab giantos sa daghang mga residente.

Lima ka mga naglangkob isip BOD sa MCWD gitaktak na ni Cebu City Mayor Edgar Labella gumikan sa kapakyas sa pagpangita og paagi nga masolusyonan ang kakuwang og supply sa tubig sa alang mga konstituwenti sa Metro Cebu.

Alang kang Chan wala siyay problema kinsa ang mapili unya nga bag-ong mga BOD sa MCWD.

Apan hangyo lang niya nga sulbaron ang suliran sa supply sa tubig sa dakbayan.

Gipadayag sa mayor nga nasagmuyo siya sa serbisyo sa MCWD.

Gihimong basehanan ni Chan ang padayong suliran sa linya sa tubig nga moabot sa Brgy. Punta Engaño hangtod karon.

Limitado usab ang supply sa tubig sa Maribago, Mactan ug Babag area sa dakbayan, dugang sa mayor.

Ang naasoyng suliran mao untay iyang gusto masolusyonan ubos sa iyang administrasyon.

Gani tinguha unta ni Chan nga masolusyonan ang naasoyng suliran sulod sa 100 ka adlaw niya isip mayor sa dakbayan.

Apan gumikan sa kakuwang og commitment sa MCWD sa pagsulbad sa naasoyng suliran hayan hangtod karon wala pa kini matuman.

Pagpasabot ni Chan nga niadtong Hulyo nakigtagbo na siya sa MCWD dihang bag-o pa siyang milingkod isip mayor sa dakbayan aron unta sulbaron ang naasoyng suliran apan wala gayud siya makakuha og commitment.

“Wala tay paki kinsa ang molingkod diha o mabutang diha (sa MCWD) ang ato how we can solve the problem of water supply sa Lapu-Lapu particular na sa Punta Engaño,” matod ni Chan.

Ang konseho sa dakbayan sa Lapu-Lapu mipasar usab og resolusyon sa ilang kadismaya sa serbisyo sa MCWD niadtong miaging buwan. (FMD, GCM, Sunstar Cebu)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph