ALANG sa Sugbo ang dul-an sa 90 kilo nga shabu nga nasakmit sa kapulisan sa usa ka checkpoint sa Maharlika Highway, Barangay Tagnao, Gandara, Samar, alas 4:30 sa hapon, Huwebes, Oktubre 17, 2019.
Ang drugas gikan sa Metro Manila ug gibiyahe padulong dinhi sa Sugbo pinaagi sa ferry boat padulong sa Samar, diin unta mosakay og laing barko ang mga courier padung dinhi sa Sugbo.
Giangkon sa usa sa mga suspek nga ikaduha na kini nilang higayon nga gihimo.
Sa unom ka mga tawo nga nasikop, lima kanila mga Sugboanon. Matod sa Gandara police, ang mga pulis nga naka-intercep gipangulohan sa ilang hepe P/Capt. Joselito Tabada.
Nakadawat sila og tip-off gikan sa Regional ug Provincial Drug Enforcement Units sa PNP nga dunay drug shipment nga moagi sa lungsod niadtong Huwebes sa hapon.
Dali silang nakabutang og checkpoint sa Maharlika Highway, sa vicinity sa Brgy. Tagnao, Gandara.
Pag-abot sa duha ka mga sakyanan, ila dayon kining gipara.
Mga lihok sa mga suspek kadudahan busa ilang gisita.
Mga suspek giila nga sila si Jeralou Aborte, 34, taga Villagonzalo 2, Brgy. Tejero, Dakbayan sa Sugbo; Leonard Delos Reyes, 33, taga Pardo, Dakbayan sa Sugbo; Elbert Abella, 57, driver, taga Lutopan, Toledo City; Steven Perez, 37, PUJ driver, taga Puntod Alaska Mambaling, Cebu city; Cesar Uy, 48, taga Gen. Trias, Cavite City; ug usa ka 14 anyos nga lalake nga Mambaling usab.
Ang unom nagsakay og duha ka mga sakyanan nga Mitsubishi Lancer (XTE 453) ug Nissan Sentra (ZLV 461).
Mokabat sa 44 ka dagkong packs ang nakuha, diin 25 ka putos ang karga sa Lancer samtang 19 sa Sentra.
Base sa Regional Crime Laboratory, mitimbang ang tanan og 88.49 kilo ug dunay kantidad nga P598,400,000 ngadto sa P600,000,000 base sa Dangerous Drugs Board (DDB) value.
Matod ni Police Brigadier General Dionardo Carlos, direktor sa Police Regional Office (PRO) 8, konektado ang shabu sa P9.5 million nga shabu nga narekober niadtong Agusto 10, 2019 sa isla sa Biri.
Niadtong tungora, ilang gitutukon ang modus ug nakahipos sila og intelligence report nga dunay mag transport og shabu agi sa rehiyon 8.
Dugang ni Carlos nga ang rota sa unom nga nasikop gikan sa Matnog- Allen- San Isidro ug pagawas na sa Region 8.
Dako og kahigayunan nga alang kini sa Cebu tungod kay sagad sa nasikop taga Cebu City.
‘Transporter’
Si Uy, usa sa mga dinakpan, niangkon sa interbyu sa mga tigbalita nga sa Cebu nila i-deliver ang drugas.
Matod ni Uy nga di sila managkaila ug ang instruction sa nagsugo kanila gipaagi lang sa tawag sa cellular phone.
“Sa akong bahin Sir, naa koy higala ba nga napriso gani karon. Siya ang naghatag sa akuang number sa tag-iya anang shabu. Ang amoang trabaho, mao lang ni, dalhon, e-drive ang shabu gikan sa Manila paingon sa Cebu. Wa ko kaila ana sa akong mga kauban, diri lang mi sa trabaho nagkailaila,” tug-an ni Uy.
Matod sa mga suspek nga nakahibawo sila nga illegal drugs ang ilang dala, apan wa sila masayod nga ingon adto ka dako kay gidid-an sila sa pagsusi niini.
Si Uy niingon nga matag usa kanila gibayran og P50,000 gawas sa menor ug sa upat ka buwang mabdos nga si Aborte nga tag P20,000 lang.
“Ang limpiyo na, Sir, singkwuenta mil. Unya lahi ra ang among panigastos samtang ga-travel mi,” angkon ni Uy.
Base sa asoy sa mga suspek sa mga tigbalita, ang mga awto andam na dihang nangabot sila sa Manila niadtong Martes.
Ang unang awto gikuha ni Uy ug Perez sa usa ka parking lot sa usa ka mall sa North Edsa.
Kompleto kini sa mga dokumento ug dunay P10,000 nga gastuhon alang sa ilang biyahe.
Ang ikaduhang awto gi-pick up gikan sa Imus, Cavite nila ni Delos Reyes ug mga kauban.
“Dili man namo, Sir, puwede labtan ang sud, pero kabalo mi nga kontrabando ang among dala, kay ako gani sir, mogamit man ko. Pero nagpalit lang ko sa gawas para sa akuang paggamit kay layo man, mag drive gyud ko”, dugang ni Uy.
Base sa instruction, mag-abot sila sa usa ka resort diin sila mangaon.
“Gikan, Sir sa Coral Reef, mosakay dapat mi og ferry diha sa Calbayog, kanang RoRo ba, Sir. Unya kay wa man hinuon mi makahibalo nga wala diay biyahe karon, unya basig makasab-an kami nga dili mi makaabot sa Cebu ugma (Biyernes, Oktubre 18), mao nga nagdesisyon ko nga mo-deretso nalang og Ormoc,” dugang asoy ni Uy.
Gisultihan usab sila nga sa pag-abot sa pantalan sa Siyudad sa Sugbo, dad-on ang mga awto sa parking lot sa usa ka mall sa Barangay Mabolo, diin kini i-park ug biyaan ang yawe sa sulod sa sakyanan.
“Mao man na, Sir, ang instruction sa amoa, ibilin lang namo ang sakyanan sa Mabolo, and yabe pud didto lang sa sakyanan, unya maghuwat na lang kami sa amoang bayad,” pasabot ni Uy.
Gidayeg usab ni Carlos ang kapulisan sa Samar Provincial Police Office, Regional Drug Enforcement Unit (RDEU) 8 ug Philippine Drug Enforcement Agency (PDEA) 8 sa pagkasakmit sa labing dakong illegal drugs shipment sa Kabisay-an sukad masukad.
Di kini ang unang higayon nga gihimo ang shipment, niabot gyod ang panahon nga naharang gyod nila ang ilang target.
Gikompirmar usab kini ni Uy ngadto sa mga tigbalita. Matod niya nga samang rota ang ilang gisubay niadtong Agusto ning tuiga, Manila-Calbayog-Cebu.
Gipakyaw
Si Kara (di tinuod nga ngan), 37, kapuyo ni Abella, dihang giduaw sa Superbalita Cebu sa ilang balay sa sityo Puntod, Barangay Mambaling, niingon nga nakugang sila sa balita.
Nahibawo sila gikan sa iyang lola, kinsa nakadungog niini sa sibya sa radyo.
Si Perez nagmaneho og PUJ biyahe og Basak-Colon, vice-versa.
Matod ni Kara nga Miyerkules sa gabie nanawag kaniya si Perez ug nipahibawo nga di una siya makauli kay dunay nipakyaw kaniya. (JKDP, BBT, AYB)