8 sikop sa 'Oplan Limpyo Talisay'

WALO ang nasikop sa subsob nga pagpatuman sa "Oplan Limpyo Talisay" nga programa sa Talisay City Police Station.

Lima kanila ang nasikop sa buy bust ug ang tulo sa illegal gambling nga naglambigit sa video karera ug mole-mole machine.

Nasakmit usab sa kapulisan ang pito ka video karera ug mole-mole machine. Gihimo ang maong Oplan Limpyo Talisay, Huwebes sa gabii, Oktubre 17, gikan sa alas 7 hangtud sa alas 10:30 sa Barangay Tangke, Dakbayan sa Talisay.

Matud ni Police Captain Mikhail Mallorca, ang deputy chief sa Talisay City Police Station, nga himuon nila nga tanang 22 ka barangay sa dakbayan sa Talisay mapahigayunan sa maong prorgama.

Una kining gisugdan atol sa unang adlaw sa paglingkud sa bag-ong hepe sa Talisay City nga si Police Major Gerard Ace Pelare.

Gipasabot ni Mallorca, nga tutok man sila sa operasyon batok ilegal nga drugas, apan iapil usab nila ang ubang ilegal nga kalihukan sama sa ilegal gambling.

Mga nasikop sa buy bust giila nga sila Frederico Padin, 40, Glenn Del Rosario, 29, Eduardo Villaro, 27, Chinbird Padillo Magadia, 55, ug Quisie Abarquez, 32.

Samtang padayon gipangita ang usa ka Christopher Solon kinsa giingong nakaikyas.

Gawas sa mga pinakete sa shabu, aduna usab nakompiskar nga .38 caliber revolver.

Matud ni Mallorca nga uban niini lantaran nga namaligya og shabu sa Barangay Tangke.

Bahad sa kapulisan sa mga nalambigit gihapon sa ginadiling drugas nga dili sila undangan sa awtoridad, ug balik-balikan gihapon sila hangtud nga momenus kon dili man hingpit nga mahurot.

Samtang nasikop ang magtiayon nga nag-mintenar og mga video karera nga sila si Eduardo ug Jussa Paculaba, lakip na ang nitaya nga si Bladie Mherl Badayos. (FMD)