TUNGOD sa mobile application nga 'Find Me,' kinawat nga cellphone ug nangawat niini nga taxi driver, ang na-trace sa biktima.
Si Kelly Lopez, 27 anyos, ang niduol sa Talisay City Police Station Biyernes sa buntag, Oktubre 18, aron sa pagpatabang sa pag-trace sa nahimutangan sa taxi driver nga nitulis kaniya alas 4 sa kaadlawon.
Ang suspetsado mao si Jovane Villamor, 56 anyos, usa ka taxi driver.
Matud ni Police Captain Mikhail Mallorca, deputy chief sa Talisay City Police Station, nga nagpatabang kanila ang biktima, human niini na-locate ang iyang cellphone pinaagi sa paggamit sa mobile application nga 'Find Me.'
Matud sa biktima nga gikan siya sa Dakbayan sa Lapu-lapu ug padulong unta nga mopauli sa ilaha sa Barangay Labangon sa Dakbayan sa Sugbo. Sa dihang nahiabot na sila sa usa ka sementeryo sa Barangay Mabolo, giingon nga gitiunan siya og kutsilyo, dayon deklarar og tulis sa taxi driver.
Na-locate niya ang cellphone pasado alas 8 sa buntag, diha na sa Barangay Bulacao, Dakbayan sa Talisay, ngadto na sa usa ka driver sa public utility jeepney (PUJ), kinsa nitug-an nga si Villamor ang nibaligya ngadto kaniya sa kantidad lang nga P1,300.
Ang maong cellphone ang nagkantidad og P16,000.
Gi-angkon sa biktima nga tungod sa iyang kakulba, wala na niya makuha pa ang pangalan ug body number sa taxi, human usab siya dali gipakanaug sa taxi, human sa pagpanulis. Apan nakamay-ong siya sa maong driver.
Sa maong application, pasabot ni Lopez, bisan sa laing cellphone kini nga anaa ang app, i-type lang ang email address sa tag-iya, ma-trace na ang nahimutangan sa imong cellphone.
Nakig-alayon na ang Talisay City Police sa taxi operator ni Villamor aron sa pagpatahan niini. Nakig- alayon usab sila sa Mabolo police station, kon diin nahitabo ang insidente. (FMD)