UPAT ka mga tinun-an ang nangaangol human naligid ang gisakyang Tamaraw FX niadtong Martes mga alas 6:18 sa gabii sa Manlauyan, Gango, Bukidnon.

Pulos mga tinun-an sa Indahag National High School ning siyudad sa Cagayan de Oro sila si Jenny Rose Cabasagan, 14; Dexter Morira, 13; Joshua Saldua, 14 ug Dyna Jean Rasonable, 11, mga mulopyo sa maong dapit.

Ang Tamaraw Fx gimaneho ni Edgar Quines nagpuyo sa Manlauyan, Bukidnon.

Usa sa paryente sa mga biktima nga nahinabi sa Sun.Star Superbalita nibutyag nga tungod sa kalayo sa tunghaan sa mga biktima kanunay kining maghulat sa manglabay nga sakyanan aron maka-hitch.

Niadtong tungora ang sakyanan ni Qiunes ang milabay ug gipara sa mga tinun-an diin pipila na usab ka higayon nga kanunay nga maka-hitch niini ang maong mga tinun-an.

Imbes duol na sa ilang mga puloy-anan ang mga biktima kalit lang nga nawad-an og preno si Quines ug tungod kay pasaka man ang agianan midausdos ug maayong pagkaligid sa sakyanan.

Ang mga tinun-an nga anaa sa sulod wala nakabantay hinungdan nga maayong pagkaangol.

Si Cabasagan maayong pagkabali sa tuo nga bahin sa kamot ug tiil niini dihang naipt, pangos ug bun-og sab kang Morira, Nabalian usab sila si Saldua ug Rasonable.

Ang driver walay samad nga naangkon hinungdan nga kini mismo ang nidala sa mga biktima sa Northern Mindanao medical Center (NMMC) ning siyudad.

Ang paryente nagtuo nga aksidente lamang ang hitabo ug walay angayng basulon. (SVB)