HUMAN mabalaka sa iyang seguridad si Arnold Solon, 29, lumad nga taga Barangay Capitan Claudio, Dakbayan sa Toledo apan kasamtangan nga nagpuyo sa Paknaan, Siyudad sa Mandaue, nitahan siya sa station manager sa sibyaanang dyHP Attorney Ruphil Bañoc.
Niangkon si Solon nga siya ang nilungkab sa vault sa bodega sa Pepsi Cola niadtong Martes sa kaadlawon, Oktubre 15, nga naa nahimutang sa Banilad, Dakbayan sa Mandaue.
Iyang nasakiyo ang P1.1 million cash.
Tungod sa kadaghan sa kwarta nga iyang nakuha, ang P400,000 lang ang iyang gikuha nga gibutang niya sa iyang hawak ug bulsa samtang ang P700,000 iyang gilubong sa yuta sulod sa bodega.
Iyang giangkon nga gi-atol niya ang paglungkab sa dihang nasunog ang bodega.
Ang attention sa iyang mga kauban didto sa sunog.
Apan sa pag-abot sa mga imbestigador sa Mandaue City Police Office, natultolan ang kwarta nga iyang gilubong sa yuta.
Nisibat na siya sa pagtuo nga mahibaw-an nga siya ang naglungkab tungod kay makita ang iyang fingerprint sa kwarta.
Nagtago-tago siya sa mga bukirang barangay sa Toledo, apan human sa pipila ka adlaw, nakonsensya siya sa iyang gihimo.
Miadto siya sa balay sa iyang igsuon aron magpatabang nga mo surrender tungod sa kakapoy na.
“Nag mahay-mahay sad lagi ko kay naamong sad akong pamilya,” matod ni Solon.
Si Solon driver sa usa ka wing van nga kargahan sa mga produkto sa Pepsi gikan sa planta niini sa Barangay Calajo-an, lungsod sa Minglanilla.
Matag gabii diha na siya matulog sa bodega sa Banilad tungod kay dugay na sila mahuman sa pagdiskarga.
Tungod sa panginahanglan sa kwarta kay manganakay ang iyang asawa sa ikaduha nilang anak ug nasunog pa ang ilang balay sa Toledo, nakahukom siya nga lungkabon ang vault sa ilang amo.
Gihimakak hinuon niya ang pasangil nga siya ang nisunog sa bodega aron malihis ang attention sa mga kaubang trahante sa sunog sanglit siya nagtuo nga kuryente ang hinungdan.
Moabot nalang sa P227,000 ang kwarta nga nahabilin sa P400,000 nga iyang gikuha ug iya kining iuli sa kompaniya.
“Ang kapin sa P100,000, Sir, akoa nang nagamit. Nya mao na lang na ang nabilin,” matod ni Solon.
Iyang gipasabot nganong kang Bañoc siya mitahan tungod kay nisalig siya niini nga di siya mahilabtan.
Kasong robbery with arson ang atubangon ni Solon tungod kay siya ang gipasanginlan nga nisunog sa bodega.