GITAY-OG sa Intensity 3 nga linog ang dakbayan sa Cagayan de Oro niadtong gabii sa Miyerkules, Oktubre 16, apan swerteng walay natalang mga nasamdan o gambalay nga nangaguba atol sa maong pagtay-og.
Gihupay sa lokal nga kagamhanan sa dakbayan ang kabalaka sa katawhan ilabi na nga dunay pagsiak sa J.R Borja bridge, ug sa usa ka patigayon sa dakbayan human nga nakasinati og pagtay-og.
Nasayran nga anaa sa Intensity 3 ang nasinatian sa dakbayan samtang anaa sa 6.3 magnitude ang nasinatian sa Tulunan, North Cotabato, diin gabilin kini og dako nga damyos ug giingong anaa sa upat ang patay.
Dali usab nga gisusi sa City Disaster Risk Reduction Management Department (CDRRMD) lakip na sa City Engineering Office ang gikatahong mga pagsiak.
Gibutyag ni Nick Jabagat, tsirman sa CDRRMD kinsa maoy usa sa mga nisusi human sa nasinatiang pagtay-og, nga dunay pagsiak sa tulay apan walay angayang ikabalaka tungod kay maagian pa gihapon kini sa bisan unsa nga klase sa sakyanan.
"Maagian ug wala pay reported nga injured," matud ni Jabagat.
Nagpadayon usab ang ilang pagsuta sa mga patigayon kagahapon.
"Padayon ta sa assessment sa ubang structures sa siyudad," dugang pa.
Samtang dali usab nga nanggawas ang katawhan sa mga mall ug lakip na ang mga empleyado ang gipapauli tungod sa nasinatiang pagtay-og.