HUGOT nga gimando sa Cagayan de Oro Police Office (Cocpo) nga pangitaon ang mga mitulis sa Quality Appliance Plaza sa J.R Borja street, dakbayan sa Cagayan de Oro, niadtong niaging adlaw.
Kahinumduman nga upat ka mga armado ang nitulis sa maong patigayon ug nadala ang dakong kantidad nga kita sa maong tindahan lakip na mga gamit sa mga empleyado nga anaa atol sa insidente.
Sa pakighinabi sa SunStar Superbalita kang Police Major Evan Viñas, tigpamaba sa Cocpo, nga hugot nga nagmando si Police Colonel Henry Dampal sa kapulisan og “manhunt operation” aron maila ug masikop ang mga suspek sa pagpanulis.
"Conduct manhunt operation to give solution to the incident po," matud ni Viñas.
Gikonsidera usab sa kapulisan nga hanas na ang maong mga suspek tungod kay nasayod kaayo kini sa ilang gihimo ug gani gidala pa ang recorder sa closed-circuit television (CCTV) camera.
Ang mga suspek giingong insakto lang ang panglawas ug nigamit og pinulongang tagalog.