LUWAS sa linog ang Misamis Oriental human nasinati ang 6.3 magnitude nga linog kon asa ang epicenter didto sa Tulunan North Cotabato niadtong gabii sa Miyerkules, Oktubre 16, diin ang dakbayan sa Cagayan de Oro ug Misamis Oriental nakasinati sab sa Intensity 3.
Giingong dako og tabang ang mga earthquake drills aron magmakalmahon ang katawhan.
Human sa linog, nimando si Misamis Oriental Governor Bambi Emano ngadto sa Provincial Engineering Office (PEO) lakip ang Provincial Disaster Risk Reduction Management Office (PDRRMO) nga subayon kon aduna bay apektado sa lalawigan lakip ang Kapitolyo kon luwas pa ba ang gambalay.
Nihimo dayon og Rapid Evaluation Assessment Report ang PEO sa pagpangulo ni Provincial Engineer Mario Batar ug Architect Joseph Arao-Arao.
Nakita nga walay gambalay nga nasibog gikan sa iyang pundasyon.
Wala sab nakita nga mga storey nga nangliki ug uban pa nga posibleng tungod sa linog.
Wala sab nakita nga mga nanghulog o buak nga glass ug walay linya sa kuryente.
Gipaabot sab nila nga luwas ang gambalay sa Kapitolyo Probinsyal.
Si Emano nagpabilin nga nagpahimangno sa publiko nga magbinantayon sa ilang tagsa-tagsa ka lawak, balay, ug gambalay kung hain man sila karon nahimutang aron daling mataho sa otoridad kung dunay namatikdan nga pagsiak.
Gipahimangnuan usab ni Emano ang mga lider sa 23 ka lungsod ug duha ka dakbayan nga magpagawas sa ilang kaugalingong post assessment report aron gilayon maaksiyonan.