GIKWESTYON ni Misamis Oriental Sangguniang Panlalawigan (SP) Member Jerry Khu ang katukoran ug pagmugna sa Provincial Governor’s Extension Office sa lungsod sa Tagoloan, Misamis Oriental.
Sa iyang privilege speech, gisulti ni Khu nga natingala siya nganong kinahanglan pa tukoran og extension office ang lungsod sa Tagoloan nga lakip man kini sa 1st class munipality ug wala kini naglisod.
Dugang niini nga ang bag-ong mayor sa lungsod adunay kapasidad nga motubag sa kinahanglan sa katawhan.
Gikwestyon ni Khu nganong wala didto gitukod ang Provincial Governor’s Office sa mga 5th ug 6th class municipality nga mas nagkinahanglan sa serbisyo.
"Makapangutana ko ba nganong wala didto gitukod sa lungsod sa Binuangan, Sugbongcogon, Kinoguitan, ug sa Balingoan ang extension office? Nga kani man sila ang mas nagkinahanglan," matud ni Khu.
Si Khu nailang kritiko karon ni Misamis Oriental Governor Bambi Emano human kontra sa partido sa pulitika nilabayng eleksyon.
Sa iyang bahin ni SP member Nancy Madjos, gipaabot niini ngadto kang Khu nga dili na kwestyunon ang mga kaayohan nga lakang nga gihimo sa gobernador kay kaayuhan man gihapon sa katawhan sa lalawigan ang tumong sa gobernador, labi na ang pagpatukod sa Provincial Governor’s Extension Office.
"Kaayohan man sa atong lalawigan ang panglantaw sa atong gobernador dili na kana unta nato kwestyunon. Ato nalang kana suportahan," matud ni Madjos.
Giwitkan sab niini ang board member nga undangon na ang pagsige panghilabot sa programa sa gobernador kay residente man gihapon kini sa Misamis Oriental nga tumong gihapon ang pagserbisyo sa katawhan.
"Ayaw na sige’g kwestyon. Paghilom nalang aron way samok" dugang pa ni Madjos.
Ang extension office gipasabot nga doulanan sa mga nagkinahanglan sa lalawigan nga dili mahatagan og pagtagad sa kalungsoran.