PRISO ang usa ka amahan human giakusahan nga milugos sa iyang kaugalingon nga anak sulod sa 15 ka tuig sa Barangay Camaman-an, dakbayan sa Cagayan de Oro.
Sa impormasyon nasayran, 5-anyos pa lamang ang anak gisugdan na og lugos sa amahan niini nga 40-anyos, kanhi overseas Filipino worker (OFW) ug usa ka electrician.
Ang anak nag-edad na karon og 20-anyos ug anaa na sa second-year college.
Nasikop ang suspek niadtong Oktubre 15 dihang giadtoan sa kapulisan sa ilang panimalay human nisumbong ang anak.
Sa pakighinabi sa SunStar Superbalita, hugot nga gipanghimakak sa amahan ang alegasyon sa anak ug niingon nga naghimo lang kini og estorya tungod kay duna kini dili maayong binuhatan nga iyang nadiskobre.
"Wala gyud nako na nahilabtan. Wala gyud na nahitabo. Busy man ko sa akong trabaho," butyag sa amahan.
Gipamugos sa amahan nga nasuko kaniya ang iyang anak human gibaharan nga mapatay ang uyab sa iyang anak kong dili mohunong sa binuhatan.
Matud sa amahan, nakabasa siya panagsultihay sa iyang anak ug uyab niini diha sa Messenger nga ipapriso siya.
Giakusahan pa sa amahan ang iyang anak nga dunay sex scandal ug giingong kini pa ang manghagad og sex sa nagkalain-laing lalaki.
Giingong buot usab sa amahan nga makighilawas sa iyang anak sa ikapilang higayon sulod sa usa ka semana human kini nasayod nga duna kini hinigugma.
Gisikop ang amahan human nangusog ang anak pagtaho sa kapulisan.
Pursigedo usab kini nga mopasaka og kaso batok sa amahan.
Inahan mikonsente?
Gibutyag sa kapulisan sa Police Station 2 (PS2) sa Cogon nga gikonsente sa asawa ang linuog nga binuhatan sa iyang bana ngadto sa ilang anak.
Gibutyag ni Police Captain Tessie Lleva, hepe sa Police Station 2 (PS2) sa Cogon, nga buot sa anak nga mosumbong sa taud-taud na nga panahon apan gibaharan siya sa iyang amahan.
Gani lakip ang iyang inahan wala mihatag og papgtagad sa iyang sumbong nga gihimo sa iyang amahan kaniya.
"Paglaki nya nagsusumbong din siya sa mother niya. Hindi niya pinapansin. Kumbaga, kinonsente niya. She knows there's an ongoing sexual relationship between her husband and her daughter," matud ni Lleva.
Gidugang pa nga makalolooy ang anak tungod kay walay gustong motabang kaniya, gani nagpakimaluoy pa ang inahan nga isibog nalang ang kaso ug pasayluon ang amahan.
"Pagpunta ng victim, nakakaawa talaga. Kasi nagmamakaawa pa yung mother and yung lola nya na i-drop yung case at patawarin yung father nya," dugang niini.
Gipasakaan na og kasong mĂșltiple rape ang suspetsado.