NAKABSAN sa iyang kinabuhi ang driver human nasungag ang gimanehong motorela kagahapon mga alas 4:25 sa kadlawon sa dalan Osmeña-CM Recto ning siyudad sa Cagayan de Oro.

Giila ang biktima nga mao si Gregorio Labadan, 57, taga Balacanas, Puntod ning siyudad.

Kauban niadtong tungora sa biktima ang mipakyaw kaniya nga mao si Virginia Daco, 48, taga Macabalan.

Nasayran nga paingon sa West bound fish landing area ang maong motorela dihang kalit lang nga mibangga kanila ang usa ka panel nga kargado og mga mananap. Nasayran nga nawad-an og brake ang maong panel.

Nadaro ang motorela ug maayong pagkapipi sa atubangan nga bahin hinungdan nga naipit si Labadan ug tungod sa kakusog sa gihimong pag-brake niini nabunal pa ang ulo sa atubangan nga bahin sa motorela.

Samaran usab si Daco nga nakaangkon og gisi sa baba sa nawong ug ubay-ubay nga bun-og sa lawas.

Gipangdala ang mga biktima sa Northern Mindanao Medical Center (NMMC) apan pipila ka minuto ang nilabay sulod sa balay tambalan nakabsan sa iyang kinabuhi si Labadan.

Samtang kritikal ang kondisyon ni Daco nga nagpabilin ning panahona sa balay tambalanan.

Sa pagsulat ning balita padayon pang giila sa kapolisan gikan sa Roads and Traffic Admninistration (RTA) ang driver sa nakabangga.