USA ka wala mailhing lalake gipusil-patay sa Sitio Abuno, Barangay Pajac, dakbayan sa Lapu-Lapu pasado alas 3 karong hapon, Oktubre 18.
Matod ni Police Senior Master Sergeant Lydo Pinos sa Police Station 2 sa Lapu-Lapu City Police Office (LCPO) nga ang biktima giingong nagdrayb ug tricycle dihang kalit nga adunay mibabag niining motorsiklo sa iyang agianan.
Daling gipusil sa gunman ang biktima makadaghang higayon nga miresulta sa iyang kamatayon.
Naka full face helmet ang mga gunman ug walay plate number ang motorsiklo niini sumala sa mga nakakita.
Wala ra hinuon maunsa ang mga sakay sa biktima atol sa pagpamusil.
Padayon pang gisusi sa kapulisan ang pagpamusil sanglit atol sa ilang pagresponde, giingong daling gikuha ang patay'ng lawas sa biktima sa mga kabanay ug wala na mohuwat sa kapulisan. (GCM)