GIKOSTUDYA sa kapolisan ang 16 anyos nga lalaki nga maoy gitumbok nga ninglugos sa iyang duha ka pag-umangkon sa Zone-2, San Lazaro, Lapasan ning siyudad sa Cagayan de Oro.
Sa migawas nga resulta sa medical examination nakitang positibong nakuha ang duha ka mga bata nga nag-edad og tulo ka tuig ug usa ka tuig kapin.
Ang inahan sa biktima nga mao si Edna (bansagon gipugngan), 28, maoy nagdala sa iyang igsuong suspetsado ngadto sa kapolisan sa Police Station 3 (PS3) sa Agora aron kini ipapriso.
Apan ang kapolisan sa PS3 nga nahinabi sa Sun.Star Superbalita niingon nga ang maong batan-on igo lamang nga gikostudya labina nga minor ug adunay nagpanalipod nga balaod niini.
Gitaho ni Edna sa kapolisan nga dako kaayo ang iyang pagsalig sa iyang manghod hinungdan nga kini ang gibilinan sa iyang duha ka mga anak samtang siya ug ang iyang bana nagtrabaho. Taod-taod na kining nagpuyo sa ilang puloy-anan ug wala siya nagtuo nga mahimo kini sa iyang igsuon ngadto sa mga bata.
Nahitabo ang pagpanglugos sa usa ka tuig nga bata niadtong Marso 3 samtang ang sa 3 anyos gisundan niadtong petsa 5 ning tuig diin giangkon usab sa suspetsado ang salaod uban sa pagpangayo niini og pasaylo.
Dili tiaw ang gibating kasakit ug kalagot sa inahan sa kaugalingong igsuon.
Sa pagsulat ning balita giatiman na ang maong kaso sa Women's and Children Protection Desk (WCPD) sa PS3.