KASAMTANGANG ania sa dakbayan sa Sugbo ang Vietnam arnis team alang sa hugot nga pagbansaybansay alang sa ilang kampanya sa 30th Southeast Asian Games nga ipahigayon sa Pilipinas sugod karong Nobiyembre 30.
Ang Vietnam team, nga gilangkuban og 21 ka arnisadors, miabot sa dakbayan sa Sugbo sa miaging semana ug nagsugod na kini’g training sa Doce Pares headquarter sa Sto. Niño Village sa Banilad ubos sa paggiya ni Supreme Grandmaster (SGM) Diony Cañete.
“Pinili namin na dito sa Cebu mag-training because it is a complete package. No.1 because of the support, no.2 it is very convenient and no. 3 the resources are here,” matod sa Filipino coach sa Vietnam nga si Ruel Gatbonton sa press conference niadtong Huwebes sa Cebu City Sports Center.
Giangkon ni Gatbonton nga dili pa tantong ilado ang arnis sa Vietnam apan malaumon siya nga sa ilang pag-training sa Sugbo, hayan dili sila bastabasta mabintahaan.
Sa arnis competitions, nga nagtangag og 20 ka gold medals nga puwedeng makuha, upat ra ka mga nasod ang magkombati.
Gawas sa Vietnam ug host Pilipinas, ang ubang mosalmot sa kompetisyon mao ang Cambodia ug Myanmar.
Si Philippine Eskrima Kali Arnis Federation (PEKAF) executive vice president ug SEA Games tournament manager Gerald Cañete, nakapabor og dako ang mga Pinoy ning maong kompetisyon. Ang arnis lumad nga gikan sa Pilipinas ug taodtaod na sab nga nag-ensayo ang mga Pinoy niini. (ESL)