ANG pambato sa Compostela Valley Province maoy midaug sa Teacher's Got Talent competition, miharbat sa grand prize atol sa national celebration sa World Teacher's Day, Oktubre 5, 2019, sa Atrium, Limketkai Mall, Cagayan de Oro City.
Si Cristele Rein M. Gonzales, 24, magtutudlo sa Atty. Orlando S. Rimando National High School sa Munisipalidad sa Maco, Compostela Valley, maoy mipawow og taman tungod sa puno sa emosyon niyang pagbirit.
Gipildi niya ang laing siyam ka kontestant sa kanta niyang "Never Enough," nga usa sa soundtrack sa top-grossing American musical biographical drama film nga "The Greatest Showman."
Gibandera ni Gonzales ang bandila sa Davao isip representante uban si Cristy Anne R. Cordova, maestra sa A.O. Floirendo National High School, Division sa Panabo City, nga miangkon sa 3rd Runner-up nga pwesto.
Nabitbit ni Gonzales isip premyo ang P25,000 cash, laptop, plake, ug pahalipay gikan sa mga partner agencies ug stakeholders.
Di na bag-o ang pagkanta kang Gonzales, diin sa sayong edad misalmot na siya sa lain-laing kompetisyon sa lokal ug nasyunal nga level.
Siya ang Garbo Comvalenyo Season 2 Grand Champion, usa ka prestihiyosong singing competition sa probinsiya.
Siya sab ang nagkanta sa provincial tourism campaign song nga "Tayo na sa Comval."
Niadtong 2010, nahimo siyang finalists sa "Star Power" uban si Angeline Quinto.
Sa kasamtangan, miyembro siya sa Tingog Bulawan Chorale, nga division teachers choir group sa Compostela Valley.
Ang national celebration sa World Teacher's Day usa ka tinuig nga tigum sa mga magtutudlo sa nasud nga giorganisa sa nagkadaiyang organisasyon, stakeholders, public ug private entities, ug indibidwal, isip tribute sa ilang kontribusyon sa educational system sa nasud. (Given G. Hinampas, Montevista National High School)