MGA pasyente sa duha ka mga ospital sa Kidapawan City wala pa tugti nga makabalik sa gambalay ug naa pa ang uban nagtulda sa city gym.
Kini human nga ang Kidapawan Doctors Hospital ug Midway Hospital nakitaan sa City Disaster Risk Reduction Management Council og mga liki, ug padayon pang gisusi human sa magnitude 6.3 nga linog niadtong Miyerkules, Oktubre 16.
Samtang mga tulunghaan sa Kidapawan City, Makilala, M'lang, ug Tulunan nga pulos sa probinsiya sa North Cotabato, wala pa mahibalik ang normal nilang klase.
Hinuon, sa ubang mga lungsod, balik na ang klase kagahapon, Biyernes, Oktubre 18.
Kahinumdoman nga duha ka tawo ang natala nga patay, samtang laing 17 ang naangol sa linog nga ang sentro kining mitay-og sa Tulunan.
Moabot sab sa 170 ka balay ang nangaguba, wala pay labot niini kadtong mga gambalay sa gobyerno.
Hangtud karon, walay puas ang aftershock sa linog nga moabot na og 259 ka higayon.
Nagpasidaan si acting Governor Emmylou Mendoza sa mga molupyo sa probinsiya nga mag-inabtik, mag-amping, ug igmaton ang kaugalingon ug dili malisang kung dunay linog. (Edgar E. Fuerzas)