SUPERBALITA CEBU

Nadela: Ipanghatag ang subrang pagkaon

Asoy ni

MAKAGUOL ang pamahayag nga giluwatan ni Pope Francis labot sa isyu sa pagkaon. Ang pangulo sa simbahang Katoliko nasubo sa kadaghan sa mga tawo sa kalibutan ang gipanggutom.

Tiaw nimo na, moabot sa 820 milyun ka mga tawo ang naglisod pagtambal sa ilang kagutom. Kini nga listahan nga gipabuhagay sa Santo Papa seryoso ug nagkinahanglan og lapad nga pagpakabana sa mga lider sa nagkadaiyang kanasuran. Di nalang ta moadto sa laing dapit.

Dinhi sa ato unsa ba ka daghana ang wala pa kalung-ag rong orasa aron may mahukad nga pagkaon diha sa mga talad kan-anan. Pipila kavtuig ang nakalabay nakahigayon ko og salmot sa iyang tulomanon nga Arangkada sa DYAB diin gituki ni Leo Lastimosa ang isyu sa subrang pagkaon gikan sa mga hotel ug ubang establismento.

Sa iyang komentaryo iyang gitataw nga ang subrang pagkaon mahimo kaayong iapud- apod ngadto sa mga gutom nga molopyo kon duna lay paagi nga maumol unsaon kini pagkolekta.

Akong nasabtan nga kon ang function room sa usa ka hotel o restawran may booking nga usa ka gatos ka tawo unya ang nitunga otsenta ra ka buok, sa ato pa dunay subra nga pagkaon para 20 ka buok nga wa motunga. Unya kay giluto naman ning daan daghan kaayo ang subra.

Pinaagi sa kasabutan ang subrang pagkaon mahimo kaayong iapud-apod niadtong benefeciaries nga naa sa listahan.

Sa akong sugyot kang Leo, ako siya nga giingnan nga mahimo kaayong mga barangay ang mopasiugda sa pagkuha sa subrang pagkaon.

Pananglit sa iyang barangay dunay lima ka hotel og lima ka restawran nga nag-operate, ang mga opisyal sa barangay mohangyo sa management alang sa usa ka kasabutan nga iapod apod ang ilang subrang pagkaon ngadto sa benefeciaries sa ilang barangay.

Sigurado ko nga di sila balibaran kay ang subrang pagkaon di man mahimong i-recycle o idalit sa ubang kustomer.

Siguro ang kapitan moumol og usa ka grupo nga mohipos ning maong mga pagkaon unya sila na sab ang moapod apod ngadto sa mga molopyo nga naa sa ilang listahan. Ang listahan pulos mga hinashasan gikan sa survey nga gipasiugdahan sa barangay.

Usbon ko anugon kaayo ang mga putahi nga motugpa ngadto sa basurahan. Ang uban niini aking nasayran sa mga baboyan mopadung kay sa akong nasayran may mga tag-iya og baboyan nga naghakot og lamaw gikan sa mga establismento.

Ang uban gani ginegosyo naman gipamaligya sa mga namuhi og baboy. Sa mga barangay nga nahimutang sa urban area abunda kaayo sa subrang pagkaon nga mapuslan pa sa ilang molopyo nga naglisod og maayo sa pagpanginabuhi. Pananglit diha sa Fuente Osmeña area naay daghang naglatagaw nga way kaon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph