MAGSAYSAY, Davao del Sur -- Gisugdan na sa lokal nga gobyerno ang pag-repack og mga food packs aron matabangan ang mga pamilya nga biktima sa makusog nga linog niadtong Miyerkules sa gabii, Oktubre 16.
Nagdeklara na sab og "state of calamity" ang lokal nga gobyerno sa lungsod human nagpahigayon og special session ang mga sakop sa Sangguniang Bayan niadtong Huwebes sa hapon, Oktubre 17.
Sumala ni Mayor Arthur Davin nga gipadali na niya ang paghatag og ayuda sa mga biktima ilabi na sa mga nawad-an og sakop sa pamilya.
Kahinumdoman nga namatay ang mag-inahan ug usa ka tinun-an sa mga barangay Malawanit ug San Isidro dihang midahili ang yuta ug natumbahan og pader.
Giklaro sab ni Davin nga suspendido pa ang klase kagahapon, Biyernes, Oktubre 18, hangtud nga di pa masegurong luwas ang mga magtutudlo ug mga tinun-an nga mobalik sa klase.
Kagahapong adlawa, Biyernes, mihimo na og makuting inspeksyon ang society of structural engineers sa ilang munisipyo nga nahiagom sab og damyos sanglit ikaduha ka higayon na nga miigo ang linog diin ang una niadtong Hulyo 9.
Gitataw sa mayor nga di mahimong maparalisa ang operasyon sa lokal nga gobyerno mao nga temporaryong nag-opisina ang mga kawani sa Lacson Hall kilid sa munisipyo.
Samtang sa pagpanubay sa SunStar Superbalita sa Purok 6, Barangay Malawanit Biyernes sa hapon, nakita sa lugar ang dagkong liki sa dalan ug yuta nga gibana-banang mga lima hangtod walo sentimetros ug 10-metros nga gilawmon nga gituohang apil sa giingong nadiskubre nga bag-ong fault line.
Ang survivor nga si Elizabeth Lozanda, 44, naghulagway nga pinakusog nga linog ang nasinati nila niadtong gabhiona sukad nagpuyo sa Barangay Malawanit.
Suwerte sab nga nabitbit niini ang iyang 6 ka bulang apo una nahugmak ang ilang balay ug luwas nga nakadagan sa gawas.
Apan hilabihan ang pagbangotan sa 29-anyos nga si Joyjoy Lakay, human nga namatay ang iyang asawa ug anak nga 10 ka bulan. (Orlando B. Dinoy)