NAKATAKDANG mag-abot sa Barangay 76-A, Bucana, Davao City ang usa ka ginang ug ang usa ka traysikad drayber dihang nasakpan sa ginang mismo nga gibaklad ang iyang anak nga dalaga samtang naligo.
Nasayran nga ang traysikad drayber kumpare sa ginang mismo.
Ang insidente nahitabo alas 8 sa gabii niadtong Huwebes, Oktubre 17, sa Saint John, Barangay 76-A, Bucana, ning siyudad.
Usa ka Mario (bansagon gitago), 45, traysikad drayber, nasakpan sa iyang kumare nga si Sherly (bansagon gitago), 48, nga samtang naligo ang iyang anak sa banyo nga usa ka 17-anyos, puwerteng lingawa sa suspek sa pagpamaklad.
Nasayran nga gikan nagpa-load ang ginang dihang sa iyang pag-agi kilid sa ilang kasilyas, naaktuhan gayud niya nga puwerteng lili sa iyang kumpare gikan sa gamay nga buslot sa kasilyas.
Diha dayon, giayo'g dumog ni Sherly ang suspek maong natawag ang atensiyon sa iyang bana ug gisumbag kini, hinungdan nga nakahiagom og daghang samad sa kalawasan ang suspek.
Gilayong gipadakop ang suspek sa kapulisan sa San Pedro Police Station, apan gibuhian ra sab kini.
Sa ulahing impormasyon, nasayran nga nakatakda nga mag-abot sa barangay ang duruha aron didto sila husayon.