HUMAN sa operasyon sa National Bureau of Investigation (NBI) 7 ug Philippine Air Force (PAF) batok sa giant clams nga nasakmit sa Barangay Catarman ug Barangay Day-as, lungsod sa Cordova, niawhag ang Bureau of Fisheries and Aquatic Resources (BFAR) 7 sa publiko nga i-report sa awtoridad kining mga makit-an nga naghupot niini.
Samtang gipasakaan na og kaso kadtong tulo ka mga tawo nga nasikop isip subject sa search warrant.
Ang NBI, PAF ug BFAR nakasakmit og 2,000 ka kilos nga giant clams diin gibana-bana nga nagkantidad og P30 milyones.
Ang mga gipasakaan og kaso naila nga sila si Roweno Tajanlangit, alyas Wenski, 28; George Uldama, 58; ug asawa niini nga si Virginia Uldama, 59, kinsa mga residente sa Barangay Catarman ug Barangay Day-as lungsod sa Cordova.
Ang giant clams mas naila nga taklobo.
Human sa dul-an buwan nga surveillance ug validation nga gihimo sa tulo ka mga ahensiya, gipatuman gilayon sa tulo ka mga ahensya ang duha ka search warrants nga giisyu ni Judge Mercedita Dadole-Ygnacio sa Branch 28, dakbayan sa Mandaue.
Matod ni NBI 7 Regional Director Atty. Tomas Enrile nga nasakmit gikan sa mga dinakpan ibaligya unta.
Dugang ni Enrile nga aduna sila’y informant hinungdan nga nahimo ang operasyon.
Nasakmit sa mga tinugyanan sa balaod ang kapin duha ka tonelada nga giant clams nga mobalor og dul-an sa P36 milyones o P18,000 matag kilo sa giant clam.
Kalapasan sa Republic Act 10654 o kining “Act to Prevent, Deter and Eliminate Illegal, Unreported and Unregulated Fishing,” diin gisang-at kini sa Cebu Provincial Prosecutor’s Office.
Gibutyag usab ni Enrile nga base sa ilang nakuha nga impormasyon, aduna pa’y nanguha ug namaligya niining giant clams hinungdan nga padayon ang ilang surveillance ug monitoring niini aron masikop kini.
Daw wala mahibawo ang mga suspek nga ilegal ang gihimo nila subay sa pagkuha ug pagbaligya niining giant clams.
Protektado usab kining giant clams sa Convention on the International Trade in Endangered Species of Wild Flora and Fauna (CITES) Appendix II.
Mapasalamaton hinuon ang BFAR 7 sa NBI ug PAF sa lakang niini sa pagprotehir sa kalikopan. (HBL)