NADUGANGAN og lima ang persons of interest sa linuog nga pagpatay sa 14-anyos nga dalagita sa sitio Caimito, Barangay Guimbawian, lungsod sa Pinamungajan, Sugbo.
Matod ni Police Major Felicisimo Aranas Jr., hepe sa Pinamungajan police station, nga ang laing lima, gawas sa 26 anyos nga silingan, boluntaryo kini nga nagpakuha og DNA sample sa PNP Crime Laboratory.
Una nang nitug-an si Dr. Benjamin Lara, medico legal officer, nga aduna silay nakuha nga specimen sa kinatawo ni Justine Andayop.
Gipasabot ni Aranas nga ang lima pulos kadudahan ang lihok sa dihang napalgan ang lawas ni Justine sa kasagbutang bahin duol sa balay niini.
Ang mga persons of interest naglangkob sa lalake nga unang nakakita sa lawas sa biktima.
Ang lalake nanguhag sagbot alang sa iyang hayop.
Ang usa mang-spray og mangga lakip na ang duha niya ka mga trabahante ug lain pang lalake nga silingan gihapon sa mga Andayop.
Di pa usab sila makasiguro kon pila ka mga tawo ang naghimo sa krimen.
“Kon duna lay mo match sa nakuha nga fluid, 100 percent na ta nga siya ang naghimo sa krimen,”matod ni Aranas.
Si Justine nakaangkon og samad sa liog diin naputol ang ubol-ubol tungod kay gigulgol sa killer.
Duna usab siyay samad sa kilid sa lawas ug dughan.
Gilubong na usab niadtong Biyernes, Oktubre 18, si Justine.
Naa pa usab sa PNP Anti-Cyber Crime Group 7 ang cellular phone sa biktima ug sa 26 anyos nga silingan.
Apan matod ni Aranas nga naglisud ang Cyber Crime Group tungod kay adunay password ang phone ni Justine.