PATAY ang usa ka batan-on nga menor de edad human gipusil pasado alas 8:00 sa milabayng gabii sa Sityo Kalubihan, Banawa, Barangay Guadalupe, dakbayan sa Sugbo.
Ang batan-on nakaangkon og upat ka mga samad piinusilan agi sa kalibre 45 sa nagkadaiyang parte sa lawas hinganlan natog Edgar, 16, nagpuyo sa naasoyng dapit.
Sa pasiunang imbestigasyon nga gihimo nilang SPO4 Rey Cuyos ug mga kaubanan sa Homicide Section nagbutyag nga naglakaw ang biktima sa dihang kalit kining gipusil sa wa hiilhing tawo.
Human matumba ang biktima, ang suspek kalma nga mibiya sa dapit nga way gisakyan.
Matod sa uyoan ug iyaan sa biktima nga nahinabi sa kapulisan nga way kontra ug buotan ang biktima busa naglibog sila kon unsay motibo sa suspek ngano nga sa iyang kalinghud, gituyoan kini sa pagpatay.