USA ka babayeng angkas sa motor ang namatay human nalabay sa dalan dihang nabanggaan sa laing motor ang iyang gisakyan didto sa Purok 2, National Highway, lungsod sa Carmen, Davao del Norte, Martes sa buntag.
Giila ang biktima nga mao si Myrna Padilla, hamtong ang panuigon, ug molupyo sa Purok 2, Barangay Salvacion dakbayan sa Panabo.
Sa report gikan sa Carmen Municipal Police Station, nasayran nga nahitabo ang aksidente pasado alas 10:20 sa buntag didto sa nahisgutang dapit.
Angkas ang biktima sa usa ka Honda XRM nga motor nga dunay plate number 7095 LB ug gimaneho ni Carmelito Padilla.
Ang motor nga gisakyan sa biktima, giingong nabangaan sa laing motor nga Honda ZN nga dunay plate number 8354 LH ug gidrayban ni Jessie Demigaya.
Sa inisyal nga imbestigasyon ni PO1 Melecion, nasayran nga nagdagan ang motor nga gisakyan sa biktima gikan sa Barangay Salvacion padulong sa may Purok 2, Barangay Ising.
Pag-abot sa nahisgutang dapit, mikabig pawala ang nahisgutang motor nga gisakyan sa biktima aron moliko unta pawala.
Apan aksidenting nabanggaan kini sa nagsunod nga laing motor nga gidrayban ni Demigaya.
Tungod sa impak, nalabay ang biktima ug nabunal sa gutter sa dalan.
Nakahiagum og grabeng mga pangos ug bun-og sa kalawasan ang biktima ug daling gidala sa Davao Regional Hospital sa siyudad sa Tagum.
Apan igo lamang nakaabot sa nahisgutang hospital ang biktima ug gideklarang dead on arrival.
Ang mga driver sab sa duha ka mga motor, nakahiagum og mga pangos sa kalawasan human sab kini nabalintong.
Ang duha ka mga motor nga nalambigit sa disgrasya, gikustodiya na sa mga otoridad.
Mihimo na pg dugang imbestigasyon ang kapulisan sa Carmen kabahin sa panghitabo. (Marvin Pineda)