TUNGOD sa sunod-sunod nga aksidente sa sakyanan, babagan na ang center island sa South Road Properties (SRP) aron ang sakyanan nga madisgrasya dili motipas sa pikas lane.
Kini ang gipahibalo ni City of Talisay Traffic Operations Development Authority Jonathan Tumulak, kinsa mipahibawo nga butangan og guard rails ang center island ang SRP aron makalikay sa dako nga danyos.
Mahinumduman nga sa niaging semana, usa ka motoristang de motor ang patay human niambak sa center island ug nitipas sa pikas lane ang usa ka awto.
Matod ni Tumulak nga iya nang naingnan ang Department of Public Works and Highways (DPWH) 2nd engineering district kabahin sa iyang suhistiyon.
Una niyang suhistiyon mao ang pagpintal sa center island nga maklaro gyud sa motorista.
Ikaduha mao ang pagbutang og directoral sign nga reflectorized aron ang motorista mahibawo sa karsada nga ilang gisubay.
Ikatulo mao ang paghimo og guard rails aron kon ang disgrasya motumaw dili na motipas ang sakyanan sa pikas lane.
Laing suhistiyon ni Tumulak mao ang pagbutang og rumble strips.
Nanghinaot si Tumulak nga unta mapadali sa DPWH ang pag-aksyon ug trabaho aron kalikayan pa ang susamang disgrasya. (FMD)