BAG-O ra milabay ang adlaw sa kasingkasing busa lab-as pa ang epekto sa katam-is sa halok. Ang pinakailadong halok sa kasaysayan mao ang halok ni Judas ngadto kang Jesus nga maoy sinyas sa pagdakop kaniya sa mga sundalong Romano.
Gitawag kini og halok sa kamatayon tungod kay dili gugma ang nagtukmod niini kondili ang tinguha nga makasapi ug kapukanan sa gihalokan.
Bisan sa bag-ong panahon, mao gihapon kini ang buot ipasabot apan managkalahi na ang porma. Apan may halok nga gikalisangan sa mga politiko karong panahon sa piniliay, ug kini mao ang pag-indurso kanila sa mga tawo nga gisaway sa kadaghanan.
Sa nangaging mga piniliay, atong nakita nga maglinumbaay ang mga kandidato ilabi na sa nasudnong puwesto nga magpalitrato uban sa presidente ug bise-presidente.
Si Tita Cory kanunay nga makitang nagpataas sa kamot sa mga kandidato kay lagi dako ang iyang papel sa paghunong sa gikasilagan nga rehimen ni Marcos ug basin mapiksan sila sa iyang suwerte.
Apan lahi na karon. Mora'g walay gustong mopalitrato kauban ang presidente kay basin halok sa politikanhong kamatayon ang sangputanan sa ilang gibuhat.
Bisan gani si Gibo nga opisyal nga manok sa Lakas KAMPI nga partido sa administrasyon walay poster nga gi-indurso siya ni GMA. Halos tanang suod sa presidente nga kandidato karon mora'g naglikay nga mahilambigit sa Malaca¤ang o sa presidente.
Nakamatikod na ba sila nga dili pabor kanila ang indurso sa presidente? Hulaton pa nato sa pagsugod sa lokal nga kampanya kung mogamit ba ang speaker nga suod kaayo sa presidente o sa ubang alyado nila sa partido sa litrato uban sa presidente sa ilang mga campaign materials.
Nagsugod na ang pagpanghipos sa taga Malaca¤ang isip pagpangandam sa taliabot nga bag-ong okupante.
Tilimad-on na kini nga dili pro-GMA ang mosunod nga presidente? Para kanako sakto lang nga di sila mopakita kauban sa presidente kay basin mapiksan sila sa malas sa administrasyon. Lahi ang sitwasyon dinhi sa lokal diin ang halos tanang kandidato gustong mobutang sa ilang hulagway kauban sa Mayor ug sa bise Mayor. Kamo kuno'y kandidato lalim ba.
***
P.D. 731 ug R.A. 9775
Gisaulog sa nasud ang semana sa pagpakgang sa pagpang-abusong sekswal ug pagpahimulos sa kabataan niadtong ikaduhang semana sa Pebrero. Subay kini sa P.D. 731 nga gilagdaan ni kanhi Pres. Ramos niadtong 1996 aron mahibaloan sa katawhan ang kamahinungdanon sa pagbatok sa abusong sekswal sa kabataan.
Usa kini ka pagpang-abuso nga nikuyanap sa atong bag-ong panahon apan dili mataho ngadto sa awtoridad tungod sa kasensitibo sa maong kaso.
Sa bag-ong panahon, anaa na ang internet, mga digital camera, cellular phones nga nakapasamot sa pagkabulnerable sa kabataan sa abusong sekswal.
Tungod niini nahimong balaod niadtong Nobyembre 2009 ang R.A. 9775 o ang Anti-Child Pornography Law. Giduso karon sa mga NGOs ug child rights advocates nga himuong permanente ang kampanya sa Davao sa pag-edukar sa katawhan sa maong isyu sa kabataan.
Karong tuiga nagpahigayon sila og children's summit niadtong Pebrero 26 lakip na ang pag-draft og Executive Order nga unta pirmahan sa Mayor aron matigayon na kining maong plano.