MGA duwa karon
4:30 pm- Columbian batok San Miguel
6:45 pm- Magnolia batok Ginebra
Nagpagawas og public apology si Calvin Abueva niadtong Sabado kabahin sa iyang salawayong mga gibuhat nga maoy hinungdan nga napahamtangan siya og indefinite suspension sa Philippine Basketball Association (PBA) niadtong Hulyo.
Gipabuhagay ni Abueva ang iyang pagpangayo og pasaylo pinaagi sa usa ka video nga iyang gi-post sa Instagram.
Si Abueva nahilambigit sa duha ka sunodsunod nga kasamok nga maoy hinungdan nga gisilutan siya sa PBA.
Usa niini mao ang tataw nga pagdapat ni Abueva sa import sa Talk N’ Text KaTropa nga si Terrence Jones sa miaging Commissioner’s Cup.
Nahilambigit sab si Abueva sa laing kasamok diin nakig-away kini sa uyab ni Blackwater Elite rookie Bobby Ray Parks nga si Maika Rivera.
“Ako po ay humihingi ng paumanhin sa mga nagawa ko po dito sa PBA,” matod ni Abueva, kinsa usa sa mga sinaligan sa Phoenix Pulse Fuel Masters.
Ang public apology ni Abueva nakitaan og senyales nga mao kini ang taytayan aron malibkas ang suspensyon ngadto sa gitawag og “The Beast.”
Hinuon alang sa ubang mga opisyal sa PBA, kinahanglang aduna pa’y dugang lakang nga himuon si Abueva una ilibkas ang suspensyon.
Si Commissioner Willie Marcial mitugot na kang Abueva nga makaapil sa praktis sa Phoenix.
Nanghinaot si Abueva nga dawaton siya pagbalik sa PBA ug misaad kini nga usabon na ang iyang kinaiya sa sulod sa korte.
“Ako po ay humihingi ng dispensa sa mga nagawa ko. Pagpapatuloy ko po ‘yung mga nasimulan ko at sana po mapabigyan niyo pa po ako. Maraming salamat po,” dugang ni Abueva.
Sa laing bahin, masubhan karong adlawa si Mo Tautuaa isip sakop sa San Miguel Beermen.
Ang Beermen moparada kang Tautuaa sa ilang pagpakigbatok sa Columbian Dyip sa premirong duwa karong hapon sa PBA Governor’s Cup sa Araneta Coliseum.
Niadtong Oktubre 14, gibuhian sa Beermen si Fil-German Christian Standhardinger aron i-trade sa NorthPort Batang Pier baylo kang Tautuaa.
Ang Beermen kasamtangang anaa sa ikatulong dapit sa standing dala ang 4-1 nga rekord samtang ang Dyip naa sa ikaunom nga adunay 3-3 nga rekord.
“Talagang nagpalakas sila because of their ulterior motive,” pasabot ni Dyip coach Jhonedel Cardel. “It just so happened nga lang na kami first test nila with Tautuaa, to play with him in a real game.”
Ning maong komperensiya, ang Beermen nagtinguha nga makalangkat sa ikaduha nilang Grandslam title, nga una nilang naangkon niadto pang 1989.
Sa main game, magsangka ang Brgy. Ginebra Gin Kings ug Magnolia Ang Pambansang Manok Hotshots. (ESL)