WALAY gibating kabalaka si Cebuana marathoner Mary Joy Tabal sa pressure sa iyang pagsagubang sa katapusang tipik sa iyang training sa Japan alang sa iyang kampanya sa 30th Southeast Asian (Sea) Games nga ipahigayon sa Pilipinas sugod karong Nobiyembre 30.
Si Tabal, kinsa lumad nga taga brgy. Guba, Cebu City, mao ang usa sa gilauman og dako nga makatunol og gold medal sa Pilipinas ning maong matag duha ka mga tuig nga kompetisyon. Ang kanhi sprinter sa Southwestern University (SWU) maoy defending champion sa women’s 42-K race.
Sa interbyu sa Sun.Star Cebu, giklaro ni Tabal nga nakatutok siya’g insakto sa iyang training bisan sa paghaguros sa Bagyong Hagibis sa Japan sa miaging semana.
“The typhoon was strong but Japan and its people were ready for it. We were informed on the things to do. There’s a bit of fear in me because we experienced Typhoon Yolanda in our country in 2013. But the structures in Japan are made to stand typhoons and earthquakes,” pasabot ni Tabal.
Ang katapusang tulo ka mga semana sa training ni Tabal mao ang labing lisod.
Naggiya kang Tabal ang dugay na niyang local coach nga si John Philip Dueñas hasta ang iyang Japanese coaches nga sila si Yuhei Sato ug Akio Usami. (RSC)