GILAYONG giayudahan, giatiman ug gisubay ang lawom nga kadaut nga hatud sa 6.3 magnitude nga linog nga misentro sa Tulunan, North Cotabato ang mga residente sa maong probinsya pinaagi sa provincial government sa maong dapit.
Gibutyag ni North Cotabato Acting Governor Emmylou “Lala” Taliño-Mendoza nga gilayon nilang giayudahan ug gisubay ang kahimtang sa mga residente gikan sa mga nadala sa ospital ug sa mga kabarangayan nga naapektuhan.
“Naayudahan dayon sila, gisubay kung unsa ang ilang mga nag-unang panginahanglanon. Gisubay sab dayon nato ang ilang kahimtang sa ospital ug ang sitwasyon sa mga residente human sa linog, aron sa pagtubag dayon sa ilang panginahanglan,” ingon sa acting governor atol sa Multi-Agency Convergence Serbisyo Caravan sa Barangay Kabalantian, Arakan, North Cotabato niadtong Biyernes.
Hinuon giingon sa gobernadora nga wala kaayo kadaut nga natala sa maong probinsya, itandi sa mga kasikbit niini nga mga lugar sama sa Magsaysay Davao del Sur nga naghatud og dakong kadaut sa mga gambalay ug gikamatay sa tulo ka mga tawo.
Andam kaayo ang North Cotabato sama sa Davao City diha sa pag-aksyon ugaling dunay dakong kadaut. Ang panguntana ngari, andam sab ba ang pipila ka probinsya ug siyudad sa nasud sa pagresponde ug pag-ayuda sa mga posibleng mabiktima sa kalamidad?
Sa paghapak bitaw sa Bagyong Yolanda, maka-ingon gyod og porbida ug pastilan ang mga tawo nga nagsud-ong sa sitwasyon sa Tacloban City ug sa mga kasikbit gumikan giingong perte kadugay ang paghatud sa mga hinabang ug serbisyo ngadto sa mga nabiktima.
Gani, nahimo pa nga tinubdan sa kurapsyon ang maong hitabo sanglit gihimong daw gatasan sa mga dakong opisyal, daghan ang gidunol nga tabang apan, giingong kulang nga naabot sa mga biktima.
Dili na unta hulaton nga mag-antus pa sa kalisod ang mga biktima sa kalamidad. Aksyonan gyud dayon gumikan hilabihan ang ilang kinahanglan. Dili na hulaton nga masawayan pa sa uban.