MGA duwa karon
12:30 pm- DBTC batok USJR (High School)
2:00 pm- USPF batok SHS-AdC (High School)
3:30 pm- CEC batok SWU (High School)
5:00 pm- UV batok UC (College)
Gipakaging sa bag-ong miyembro nga University of Cebu-Lapu-Lapu-Mandaue (UCLM) ang defending champions University of Cebu (UC) Baby Webmasters, 69-66, kagahapon sa high school division sa Cebu Schools Athletic Association Inc. (Cesafi) sa Cebu Coliseum.
Mao kini ang labing unang kadaugan sa UCLM sulod sa pito ka mga duwa.
Ang Baby Webmasters, taliwala sa kapildihan, nagpabilin sa liderato nga nagbitbit og 7-1 nga rekord.
Si Joseph Nalos maoy nahimong bayani sa makasaysayong kadaugan alang sa UCLM dihang napasulod niya ang nakapadaog nga three-point shot sa nahabiling 3.6 segundos.
Sa return play, ang anak ni ex-PBA star Dondon Hontiveros nga si Baby Webmasters forward Isaiah Miguel Blanco misuway pagpugos og overtime apan nasipyat siya sa iyang tira sa three-point land.
Gipangulohan ni Ryan Nemenzo ang UCLM pinaagi sa iyang 17 puntos, nidugang og 16 puntos si Nalos samtang niamot og 14 puntos si Kirt Jalalon.
Ang Baby Webmasters gipangulohan ni Daniel Lapiz, nihatag og 13 puntos si Allen Ray Gako samtang nitunol og 12 puntos si Blanco.
Kulbahinam sab ang laing duwa sa high school division diin nakaipsot ang University of San Carlos (USC) Baby Warriors sa pagpanghudlat sa Cebu Institute of Technology-University (CIT-U) Wildkittens, 73-70.
Ang Baby Warriors mingsaka sa 3-4 nga rekord samtang ang Wildkittens mingkanaog sa 2-7 nga baraha. (ESL)