NORTH COTABATO -- Nanghikling na sab ang gatusan ka pamilya sa subling pagtay-og sa yuta alas 8:46 sa gabii niadtong Biyernes, Oktubre 18, sa siyudad.
Sa taho gikan sa City Disaster Risk Reduction Office, nasayran nga namakwit ang mga namuyo sa Sitio Sabayan, Barangay Ilomavis sa dakbayan gumikan sa mga kusog nga aftershocks sa 6.3 nga linog niadtong Miyerkules, Oktubre 16.
Nangatulog ang dul-an duha ka libo ka mga molupyo sa basketball court sa Barangay Ilomavis.
Kini gumikan sa kahadlok nga mahugno ang ilang mga balay nga nangliki na sa unang pag-igo sa 6.3 magnitude nga linog ug anam-anam na sab nga midahili ang yuta.
Ang Barangay Ilomavis anaa sa bungtod nga bahin sa siyudad ug anaa sa tiilan sa Mount Apo.
Nagpabilin sab sa City Gym sa siyudad ang mga pasyente sa duha ka balay tambalanan gumikan wala pa sila gitugotan nga mobalik sa mga nangliki nga semento sa ospital.
Samtang gipailawom na sab sa state of calamity ang Makilala ug posibleng mosunod ang Tulunan, M’lang ug Kidapawan City gumikan sa grabeng damyos sa linog.
Hangtud karon padayon nga nasinati ang pagyugyog sa yuta sa probinsiya nga aftershocks nga sentrong miigo sa Tulunan. (Edgar E. Fuerzas)