KASONG pagsupak sa Republic Act (RA) 10591 kun illegal possession of firearms and explosives ang gipasaka nga kaso batok sa usa ka personal bodyguard human kini nakuhaan og armas nga walay igong papeles atol sa checkpoint sa Gazmen Road, Barangay La Filipina, Tagum City.
Ang gikasohan mao si Ruben Lausa Alicaway, 37, molupyo sa La Concepcion, Barangay La Filipina sa nahisgutang siyudad.
Niadtong taknaa, ang dinakpan nagmaneho sa iyang motorsiklo ug miagi sa checkpoint nga gilusad sa Tagum City Police Office, dihang sa paghiling sa iyang sling bag, nakita ang usa ka kalibre .45 nga pistola ug 40 ka mga buhing bala.
Dihang gipangitaan og papeles ang suspek sa iyang pagdala sa pusil, wala kini nakapakita, hinungdan nga temporaryo kining gikustodiya.
Sumala sa kapulisan sa rehiyon nga seryusohon gayud nila ang kampanya agi’g derektiba sa taas nga buhatan sa pulisya.
“The PNP is very serious in its campaign against loose firearms. In fact, we have the Oplan Katok for people with expired firearms licenses or no LTO. It’s the only way that we can achieve peace by recovering these loose firearms,” ingon ni Police Regional Office (PRO) Davao Region director Marcelo Morales. (Jeepy P. Compio)