3 most wanted sa rehiyon nasikop

CAMP SGT. QUINTIN M. MERECIDO, Catitipan, Davao City -- Nagtingkagol na sa prisohan ug naghulat na lang sa sunod nga mando sa korte labot sa ilang kaso ang tulo kinsa gikonsiderang mga most wanted person sa Davao Region human sila nasikop sa awtoridad subay sa gahum sa warrant of arrest.

Pinaagi sa usa ka joint operation, unang nasikop sa Quezon St., Barangay Poblacion, Lupon, Davao Oriental, si Exequiel Almacen Rule, 69-anyos, minyo, ug residente sa dapit, kinsa gikonsidera nga no. 9 most wanted person.

Nasikop ang suspek pinaagi sa warrant of arrest nga gi-isyu ni Presiding Judge Emilio G Dayanghirang III sa RTC-XI, Branch 32, sa 11th Judicial Region, sa Lupon Davao Oriental sa kasong sexual abuse ubos sa Republic Act (RA) 7610 pinetsahan Mayo 21, 2019.

Giingon nga gihaluk-halukan ug gimolestiya sa suspek ang usa ka 15-anyos niadtong tuig 2018 ug nasundan kini niadtong Enero ning tuiga.

Sikop sab sa Manay Municipal Police Station ang usa ka Lauren Macasambat Sr., 52-anyos, minyo, pedicab driver; ug usa ka Gary Macasambat (Top 1 most wanted person), 29-anyos, laborer, pulos nagpuyo sa Barangay 23-C, Isla Verde, Davao City, diin kasong frustrated murder ang giatubang sa duha.

Seryuso karon ang kapulisan sa pagsilbi sa mga warrant of arrest sa mga tawo nga dunay kalapasan sa balaod.

“This accomplishment is the result of the collaborative efforts of all police units in Region 11 who worked hand in hand to provide a safe place for everyone and to guarantee that all lawless elements will be placed behind bars,” ingon ni Police Brigadier General Marcelo Morales, director sa Police Regional Office-Davao. (Jeepy P. Compio)