DUHA ka mahinungdanon nga mga kalihukan ang dungan nga gisaulog sa pamilyang Boyo niadtong Septiyembre 25, 2019 sa Movenpick Hotel Mactan Island Cebu, siyudad sa Lapu-Lapu.
Una ang ika-9 nga kasumaran sa adlaw nga natawhan sa kamaguwangan nga anak nila ni Mark Anthony ug Sheila Boyo nga si Schwartzy Magne.
Ikaduha, ang dedication sa kamanghuran nga anak nga si Stacey Magaux, duha ka buwan nga bata.
Ang dedication usa ka seremonyas diin ang Christian nga mga ginikanan mopahinungod sa ilang anak nga masuso ngadto sa Ginuo ug mosaad nga magdako kini isip usa ka sulundon nga tawo.
Matod ni Mark Anthony, 36, tag-iya sa SMB Tourist Transport ug amahan sa duha ka mga bata, nga nag family planning sila sa iyang asawa nga si Sheila hinungdan nga wa dayon masundi ang ilang unang liwat nga si Schwartzy Magne.
Miabot og 100 ka mga bisita ang nitambong sa duha ka kasaulogan.
Suod nga mga higala sa magtiayong Boyo ang gikuha nga mga ninong ug ninang.
Apil niini sila si Senador Ronald “Bato” dela Rosa ug Philippine Charity Sweepstakes Office (PCSO) General Manager Royina Garma. Apan pulos wa makatambong sa kasaulogan ang duha ka mga opisyal.
Usa ka mahalon nga cellphone ang regalo sa magtiayong negosyante ngadto kang Schwartzy, kinsa Grade 4 sa East Crest Learning Academy sa Barangay Guadalupe, siyudad sa Sugbo. (SCG)