Vallena: Balaudnon sa habalhabal

MALIPAY na ang mga habalhabal driver kay dako na ang kahigayunan nga mahimong legal ang ilang operasyon karon nga duna nay gipangduso nga mga balaudnon sa Ubos Balay Balauranan ug Senado.

Sa Ubos Balay Balauranan, gi-refile na pipila ka mga buwan ang nakalabay ang balaudnon ni Kongresista Raul del Mar. Bag-o ra sab gi-file ni Senador Sonny Angara ang Senate Bill 1025 nga mag-amendar sa Land Transportation and Traffic Code.

Nalipay sab ko nga sa katapusan, giila na sa dagkong mga opisyal sa kagamhanan ang kamahinungdanon ug dakong kontribusyon sa mga habalhabal sa kalisod sa transportasyon sa nasod. Mao man gud ni ang solusyon sa kakuwang sa pasaheroang mga sakyanan sa kabukiran ug uban pang hilit nga mga dapit. Mao usab ni ang daling masakyan sa urban centers kon magdali ka sa lakaw taliwa sa grabeng suliran sa trapiko.

Maanindot ni nga kalambuan kay pinaagi na usab niini, makontrolar na ang gidaghanon sa mga habalhabal. Bisan asa na lang kini sila mopwesto sa mga karsada sa Metro Cebu, nga ang uban nahimo na hinuong nakaapekto sa trapiko, sama diha sa Salinas Driver sa Lahug.

Gihimo na man unta na nga discipline zone apan, wa masustener sa lokal nga mga opisyal ug kapulisan. Kana lang mopadung na ka og tungas sa Busay lagbas sa eskina sa Salinas, kadaghan sa mga habalhabal r diha, apan gipasagdhan.

Regulasyon

Pinaagi usab sa balaud, ma-regulate na ang pletihan, ma-check ang mga badlungon ug di na si bisan kinsa lang ang maka-drive. Kay sa pagkakaron, wa makontrolar ang ilang gidaghanon. Sila ra sab ang magbuot asa sila magtapok. Sa sugod, usa, duha, tulo hangtod managhan na sila sa usa ka dapit.

Maayo gani kay dinhi sa Dakbayan sa Sugbo, si Cebu City Councilor Raymond Alvin Garcia niduso og ordinansahon alang sa habalhabal operations. Estrikto ang mga probisyon sa iyang ordinansahon ug naghatag sa matag barangay sa mas direktang kontrol sa operasyon sa habalhabal. Alang nako, mas maayo kini.

Problema sab

Solusyon tuod ang habalhabal. Apan nahimo usab kining problema tungod kay misulbong ang ilang gidaghanon, to the point nga bisan asa na lang sila mopasok. Diha lang gani sa dan Ramos, nisugod na usab unta sila og panaghan.

Nakamatngon tingali ang management sa usa ka banko, gipangbadlong sila hangtod nga nagkaanam og kawagtang. Wa na ko makakita nila nga magtambay pa sa mao nga lugar. Gihasulan tingali ang management kay nakababag na man sila sa mga kliyente.

Pinaagi sa balaud, kana kon mapasar na ang balaudnon, seguradong duna kini mga probisyon nga mag-regulate sa mga habalhabal.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph