SUPERBALITA CEBU

Diola: Kulit ug uban pa

Mao diay

Binasi sa Exodo 17:8-13; Salmo 121; 2Timoteo 3:14-4:2; Lucas 18:1-8

DILI mahitungod sa mangungulit ang akong paggamit sa pulong kulit kondili ang bulohaton sa tawo nga dili mahimutang ug nagpunay og samok sa uban mahitungod sa iyang panghinahanglan. Dili pa dugay aduna koy kaila nga gisamokan sa usa ka tawo nga kulit. Aduna man goy igbabaligya nga butang ug nagpunay na lang og “follow up” ang nagpahigayon sa maong transaksyon. Diyotdiyot na lang motawag. Human motext. Sunod mag-messenger. Human manawag na pod bisan pa og gipasabot na siya nga maghulat.

Wa na makaagwanta ang akong kaila ug iyang gihulga ang gasamoksamok kaniya nga kon magpadayon siya og kulit kaniya, iyang i-block ang iyang ngalan sa cellphone ug sa internet. Mihunong ang tawo. Nakaatbang niya ang usa ka babaye nga maantigo sad mangulit.

Gikulit sa balo sa ebanghelyo ang usa ka maghuhukom mahitungod sa iyang katungod sa usa ka kaso. Nasamokan ang maong garboso nga maghuhukom tungod kay ang balo nagpunay gyod og kulit kaniya. Nahadlok siya nga basig mabun-og (“blackeye”) siya sa maong babaye. Kon napugos na lang ang maong garbosong maghuhukom sa paghatag og katarongan tungod sa kasamokan sa babaye, unsa pa kaha ang maluluy-ong Ginoo sa pangaliya sa mga tumutuo? Sa pulong pa sa ebanghelyo: “Ug dili ba diay moaban ang Dios sa iyang mga pinili nga nagtukaw kaniya adlaw ug gabii?”

Matukawon ug malahutayong pag-ampo ang gihisgotan sa maong sambingay. Mao kini ang nakat-onan ni Abraham. Sa ilang pagpakigbatok sa mga Amalekihan-on, matag isa niya sa iyang kamot nagmadaugon ang mga Israelita. Kon mokanaog ang kamot malupig sila. Gitabangan siya aron maisa ang iyang mga kamot hangtod nga mapildi ang kontra. Gawas sa pagkakulit gikinahanglan usab ang pagkamakanunayon sa pagsalig sa Dios nga gisimbolo sa pag-isa sa mga kamot.

Sumala sa atong katesismo, dili sayon ang pag-ampo nga matukawon ug malahutayon. May mga babag sa atong panghunahuna. Nagkanayon ang katesismo: “Uban sa mga sayop nga hunahuna sa pag-ampo, daghan nagatoo nga sila walay panahon sa pag-ampo o nga ang pag-ampo walay kapuslanan. Kadtong naga-ampo sarang mawad-an og kadasig atubangan sa mga kalisdanan ug dayag nga kakulangan sa kalamposan. Ang pagpa-ubos, pagsalig ug paglahutay gikinahanglan aron mabuntog kining mga balabag”.

Usa sa mga mohatag og espirituhanong kadasig sa atong pag-ampo mao ang Bibliya. Mao nga gidasig ni San Pablo si Timoteo sa pagbasa kanunay sa Balaang Kasulatan nga sa panahon nila mao ang Karaang Kasabotan. Miingon si Pablo: “Ang tanan Balaang Kasulatan inspirado sa Dios ug magamit sa pagtudlo, sa pagdumili, sa pagpatul-id, ug sa pagbansaybansay sa pagkamatarong, aron ang tawo nga iya sa Dios mahimong batid, sangkap sa tanang maayong buhat”. Kon manukad kita sa sinulat nga Pulong sa Dios, makasiguro ta nga ang atong pag-ampo epektibo ug dunggon sa Ginoo.

Maantigo ba kitang mangulit sa atong Ginoo?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph