HUMAN sa water crisis nga atong nasinati gumikan sa kakuwangon sa supply sa tubig nga nahatag sa Metropolitan Cebu Water District (MCWD) ngadto sa ilang mga customer, karon mitumaw na usab ang traffic crisis. Kini maoy hinungdan nga ang Hunta Probinsiyal mideklarar og traffic crisis sa Sugbo pinasikad sa resolusyon ni Bokal Glenn Soco sa sixth district. Matod ni Soco nga nagkagrabe na ang problema. Karon pa diay nakamatikod si Soco nga hagbay ra man ni?
Ambot kon natayming ba lang o tinuyo nga sa dihang gideklarar sa Hunta Probensiyal ang traffic crisis niadtong Lunes, nianang buntag, nagbaktas si Gov. Gwen Garcia gikan sa Don Gil Garcia paingon sa Kapitolyo gumikan sa grabeng traffic aron di siya ma-late sa flag raising ceremony.
Matod pang Soco nga mokabat ngadto sa P1 bilyon ang mawala sa natad sa ekonomiya sa Metro Cebu gumikan lang sa trapiko. Kini base sa pagtuon sa Japan International Cooperation Agency (Jica). Gawas sa kahuot sa trapiko, ang situwasyon makahasol sa katawhan ug kakuyaw sa panglawas sama sa air pollution.
Igo lang mipasar og resolusyon ang Hunta Probensiyal nga nag-awhag sa Kongreso nga ipadali ang pagpasar og mga balaod nga maghatag og epektibo nga solusyon ning maong problema. Mao ra. Wala gyud motanyag si Soco og mga pamaagi kon unsa-on sa pagsulbad ang problema sa trapiko. Ang angay untang himoon ni Soco dili lang ang pagdeklarar og traffic crisis kon dili motanyag unta siya og mga pamaagi pagsulbad sa maong problema.
Ang problema god aning mga magbabalaod sama ni Soco, maayo lang mosing-al pero way gikatanyag nga solusyon. Mo-deliver lang og privilege speech o mosang-at og resolusyon para lang publisidad. Unsa may angay nilang himuon? Road widening? Ipadali ang mass transport system? Hawanan ang dalan sa mga nakababag? Did-an ang mga dagkong trak nga mo-agi sa kinapusuran? Number-coding? Magbutang og tunnel o skyways? Unsa ba gyud? Sa dihang siya pa ang chairman sa Infrastructure and development committee sa Regional Development Council (RDC), si Soco maoy kusog mobabag og mga proyekto sa inprastraktura nga makasulbad unta gamay sa trapiko. Unya karon maoy kusog moreklamo. (bobbygnalzaro@gmail.com)