GRABE unta ang pagbaha sa illegal drugs dinhi sa Cebu kon nakasulod pa ang 88 ka kilo nga shabu. Nadugang unta kini sa una nang gi-deliver nga illegal drugs nga gidala sa grupo niadtong Agusto. Hayan pareho ra tingali ang gidaghanon sa mao nga shipment sa nasakmit niadtong Huwebes sa hapon sa Gandara.
Matod sa usa sa mga suspek nga ikaduha na kadto nilang shipment ug sama ra ang rota, Manila-Calbayog City-Cebu City. Roro nga barko ang ilang gisakyan.
Kasagaran man gud sa mga sakyanan nga ikarga aning ro-ro nga mga barko, di ipailawom sa inspection mao nga dali rang makalusot. Kon gihiling pa unta ang mga sakyanan, hayan sa pantalan pa lang nabantayan na ang shabu.
Sa sulti pa ni Cesar Uy, suspek, niadtong Agusto nakapalusot na sila dinhi sa Cebu agi sa Calbayog sakay sa barko nga modunggo sa pantalan sa Dakbayan sa Sugbo.
Kini timailhan nga lugak pa kaayo ang seguridad sa kadaghanan sa mga dapit sa nasod. Ang hugot nga seguridad naa lang sa mga pantalan nga dagko ug sa departure lang, wa sa arrival.
Gikinahanglan nga pahugtan pa sa Philippine Drug Enforcement Agency, Philippine National Police, Philppine Coast Guard ug uban pang mga ahensya sa kagamhanan ang seguridad pinaagi sa pagbutang og dugang K-9 units ug mga ekipo aron masusi ang mga sakyanan.
Human ma-intercept ug mabuking ang ilang pamaagi sa pagpalusot sa illegal drugs, seguradong dunay himuon nga adjustment ang mga sindikato sa drugas. Hayan, ila nang usbon ang ilang rota apan, sa samang paagi.
Kon di hugtan ang seguridad, di mapugngan ang pagbaha sa shabu, labina dinhi sa Sugbo nga taas og kunsumo ini. Bisan pila pa ka mga ronda ang pagahimuon, basta naa pay ikabaligyang drugas kay abunda, seguradong mapakyas ug usik ang kampanya sa kagamhanan batok sa dangan sa illegal drugs.