Milihay sa fingerprint, 'nangawat' nabuko hinuon

BISAN wa pa nitahan ang driver sa wing van, suspek na siya sa pagkawat sa P1.1 million gikan sa usa ka vault sa bodega kay wa siya magpakuha sa iyang fingerprint sa kapulisan atol sa imbestigasyon.

Tanang mga kawani nagpakuha, gawas kang Arnold Solon, 29, matod ni Police Staff Sgt. Richard Cabello.

Wa na siya makit-i pa dihang gipangita sa mga pulis.

Sigon ni Cabello nga adunay sunog sa warehouse ug gitabangan og pawong sa sales manager ug bodegero. Samtang sila nagpawong sa kayo, giingong gilungkab ni Solon ang vault sa opisina sa manager.

Human mapalong ang kayo, nabantayan sa manager nga abli na ang vault, wa na ang bag nga naay sulod P1.1 million.

Diha-diha dayon mitawag ang manager sa kapulisan.

Niresponde ang kapulisan ug nimando nga way pagawason nga empleyado o mga sakyanan sa bodega.

Atol sa fingerprinting, si Solon ra ang wa nisumiter ug wa na siya makit-i sulod sa bodega.

“Naay niduol sa ako niingon nga nakit an namo na (si Solon) nga nagdala og balde. Gisulod diay niya sa balde ang bag kay mailhan man siya nga magdala siya og bag. So, gibutang niya sa balde ang bag,” sigon ni Cabello.

Ang P400,000 ra nga puro tag P1,000 nga papel ra ang iyang nadala. Gibilin ni Solon ang bag nga adunay P700,000 nga puro tag P20 ug tag P50 sa gawas sa bodega nga gitabunan og mga puthaw ug sin.

Tungod kay wa na mipatim-aw si Solon sa bodega, giadto sa kapulisan ang iyang balay sa Barangay Paknaan sa Mandaue ug balay sa iyang asawa sa dakbayan sa Toledo apan wa na kini ngadto.

Sigon ni Cabello nga nahadlok na si Solon hinungdan nga ni-surrender sa sibyaanang dyHP niadtong Biyernes, Oktubre 18, 2019. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph