MOKABAT sa P12 bilyones ang giduso nga budget sa Probinsya sa Sugbo ngadto sa Provincial Board alang sa 2020.
Mas taas kini og 156% kon itandi sa P4.79B nga gahin sa Probinsya sa miaging tuig.
Gahinan og labing dako nga pundo nga mokabat sa P6 bilyones ang social services diin nalakip ang mga hospital.
Lakip sa gihatagan og prayoridad ni Gobernador Gwendolyn Garcia mao ang pag-improve sa mga imprastraktura, barangay health stations, heritage parks sa mga lungsod nga gigahinan og P5 bilyones ingon man ang pag konkreto sa target nga 250 kilometros nga provincial roads ug 100 kilometro sa barangay roads.
Lakip sa gigahinan og labing dako nga pondo ang pag upgrade sa provincial hospitals nga moabot og P4.2 bilyones isip pagpangandam na usab sa Universal Health Law.
“Interestingly, atong personnel services, atong PS appropriation, our PS Limitation is 45% but, we are well below at 22%”, matod ni Garcia.
Daan na usab nga misaad ang gobernador nga lakip na sa iyang hatagan og importansya sa pag-develop sa level III water systems sa mga lungsod.
Gipanglantawan ni Garcia nga mosaka pa usab ang income sa Probinsya.
“It means that we are redirecting our resources to what I believe are of priority and of paramount importance infra and health and it also means that we are projecting much higher revenues aside from the expected IRA, because of the measures we are now instituting in the finance department”, matod ni Garcia.
Ang proposal susihon pa sa Sangguniang Panglalawigan sa sunod semana.
Samtang mas tutukan karon sa administrasyon ni Garcia ang pag- recover sa mga luna nga gipanag-iya sa Probinsya.
Tungod kay matod niya usa kini sa nakatampo sa padayong pagtungtong sa Sugbo sa unang pwesto ug labing dato nga Probinsya sa kinatibuk-an nga 81 ka mga lalawigan sa nasud.
Sa annual financial report sa Commission on Audit (COA), mokabat sa di mo menos P35 bilyones ang natala nga total asset sa probinsya sa 2018.. Mas taas kini kon itandi sa 2017 nga may P34.14 bilyones. (ANV)