POLICE Regional Office mopa background check sa lima ka mga Sugboanon nga nadakpan sa kapulisan sa Gandara, Samar ug Philippine Drug Enforcement Agency (PDEA) 8 sa Leyte ug nakuhaan og gibana-bana 88 kilos sa gituohang shabu.
Matod ni Police Colonel Ildebrande Usana, deputy regional director for administration sa PRO 7, nga sa pagkakaron wa pa nila masubay ang lima, nga naglakip sa babayeng mabdos ug 14 anyos nga lalake.
Mohimo sila og background check.
Lakip sa ilang sutaon kon ang mga suspek nalakip ba sa watchlist nunot sa kadaghan sa drugas nga nakuha gikan kanila sa usa ka police checkpoint sa Gandara niadtong Huwebes sa hapon, Oktubre 17.
Mga suspek nga nakuhaan sa shabu nga gisakay sa duha ka mga awto giila nga sila si Jeralou Aborte, 34, taga Villagonzalo 2, Brgy. Tejero, Dakbayan sa Sugbo; Leonard Delos Reyes, 33, taga Pardo, Dakbayan sa Sugbo; Elbert Abella, 57, driver, taga Lutopan, Toledo City; Steven Perez, 37, PUJ driver, taga Puntod Alaska Mambaling, Cebu city; Cesar Uy, 48, taga Gen. Trias, Cavite City; ug usa ka 14 anyos nga lalake nga taga sityo Puntod, Brgy, Mambaling usab.
Bisan si Uy taga Cavite, larino siyang nisulti og Bisaya.
Tungod niini, ang kapulisan mopahugot pa sa ilang pagbantay aron di sila malutsan sa illegal nga drugas, ilabi na sa mga pantalan uban sa mga personnel sa Philippine Coast Guard (PCG).
Pahugtan usab nila ang ilang check points sa strategic locations sa Central Visayas aron masiguro nga ang tanang mosulod sa isla sa Sugbo mabantayan sa mga awtoridad.
“We will be assuring the public that appropriate operations will be conducted to include check points in different strategic locations in order to insure na ang pagpasok na ito ay ina address na,” matod ni Usana.
Giangkon niya nga di lang ang Central Visayas ang naapektohan sa illegal nga drugas sanglit nikatap na kini sa tibuok nasud.
Di sila makatugot nga himuong hagbonganan sa illegal nga drugas ang Sugbo.
Si Police Colonel Roderick Mariano, hepe sa kapulisan sa Probinsya sa Sugbo, sa iyang bahin, nagkanayon nga kay taga Cebu ang lima, tipik sa shipment alang sa Cebu.
“There is an info na sabi nga na papunta daw ng Cebu yun. Di natin alam kung Cebu City ba, whatever na siya pupunta, pinalakas natin yung security along coastal areas natin,” matod ni Police Colonel Gemma Vinluan, director sa Cebu City Police Office (CCPO).